صور فيديوهات للترويج لبيعها خارج البلاد.. ننشر أقوال المتهم بالتنقيب عن الآثار بالبدرشين |خاص
كشفت التحقيقات في قضية التنقيب عن الآثار بالبدرشين التابعة لمحافظة الجيزة، والمتهم فيها 6 أشخاص، أن المتهمين قاموا بالحفر والتنقيب عن الآثار، وذلك ليتمكنوا من الوصول إلى مقبرة أثرية تحتوي على آثار فرعونية، وشرعوا في البحث عن وسيلة لبيعها وتهريبها لخارج البلاد.
التحقيقات في قضية التنقيب عن الآثار بالبدرشين
وينشر القاهرة 24 التحقيقات في القضية رقم 18465 لسنة 2022 جنح البدرشين، والتي أسند فيها للمتهمين الحفر والتنقيب عن الآثار وتكوين تشكيل عصابي لتهريب الآثار خارج البلاد.
س: ما قولك فيما هو منسوب اليك من أنك متهم وآخرون بالحفر خلسة بقصد الحصول على آثار بقصد التهريب؟
ج: محصلش.
س: ما الذي حدث إذًا.. وماهي تفصيلات ضبطك وعرضك علينا؟
ج: اللي حصل إني من فترة في حد من البدرشين بتعامل معاه في مقاولات اسمه الحاج سعد أبو هنا، قالي إن في أرض بتاعت واحد غلبان اتسجن عشان بيحفر عن آثار فيها، وهو دلوقتي عايز يبيعها عشان يصرف على نفسه فقالي تعالى شوفها ولو لقيت حد يشتريها قولنا وفعلا جيت شوفتها وبعد كده بقيت أكلم كذا واحد، لحد ما الحاجة سهير اتصلت بيا وقالتلي أنها هتيجي معايا تشوفها عشان تعرضها للبيع علي أي حد عايزها، وفعلا قابلتها وركبت معاها عربية كانت جايباها بسواقها ورحنا الأرض وقالتلي كويسة بس عايزين حد يشيل الزبالة، فأنا كان معايا رقم بتاع لودر كلمته جالنا وبعد ما جه قال دي أرض آثار وبعدها قوات الأمن خدتنا وفضلنا في قسم الشرطة لحد ما تعرضنا علي جهات التحقيق.
س: أين حدث ذلك؟
ج: الكلام ده حصل في منطقة تل العزيزية في البدرشين.
س: وما هو سبب ومناسبة تواجدك بالمكان والزمان سالفي الذكر؟
ج: كنت زي ما قلت باجي أشوف الأرض دي عشان أوريها للست سهير.
س: هل قام القائم على ضبطك بتفتيشك؟
ج: أيوة.
س: وما الذي أسفر عنه ذلك التفتيش؟
ج: كان معايا موبايل وفلوس 5 آلاف جينه.
س وماهي كيفية وبادرة لقائك وتعرفك على المتهمة سهير. أ.ع؟
ج: أنا لما بدأت اعرض الأرض لقيتها كلمتني وقالتلي عايزة تشوفها عشان تعرضها.
س: وما هي طبيعة ما أخبرت به سالفة الذكر إذا؟
ج: قلتلها إن دي أرض كان عليها مشكلة عشان صاحبها بيحفر فيها يدور على آثار واتحبس، ودلوقتي بيدور على حد يشتريها.
س: وكيف نمى إلي علمك بعرض تلك الأرض للبيع؟
ج: واحد معرفة اسمه الحاج سعد أبو هنا من البدرشين ومعرفش بيانات تانية عنه.
س: وما الذي أخبرك به بشأن تلك الأرض؟
ج: قالي صاحبها غلبان وكان أتمسك بيحفر فيها عشان بيدور على آثار وعايز يبيعها.
س: وهل وقفت على شخص مالكها إذًا وأوراق ملكيته؟
ج: لا
س: وما الذي حال دون ذلك؟
ج: معرفش أنا قلت لما أشوف حد يرضى يشتري الأول وبعدين أتأكد.
س: وما الذي حال دون عدم الموافقة علي ذلك الاتفاق عقب علمك بما سبق ذكره؟
ج: أنا قلت أن أكيد مفيش عليها مشاكل معرفش أنها أرض ملك الأثار أصلا.
س: وماهي كيفية وظروف تقابلك مع المتهمين يوم الواقعة؟
ج: أنا اتقابلت مع الست سهير عند المريوطية وكانت راكبة عربية ملاكي سايقها محمود، وركبت معاها وهاني وعبدالله كانوا هناك مستنيني في الأرض وعماد ده سواق اللودر اللي كلمته ييجي يشيل الزبالة من الأرض.
س: وما هي طبيعة تلك الأرض تحديدا؟
ج: هي أرض فاضية وكان فيها حفرة كبيرة وسعد أبو هنا قالي إن دي الحفرة اللي كان بيحفرها صاحبها واتمسك عشانها، ومعرفش أنها تبع الآثار.
س: وما هو قولك فيما هو ثابت بمحتوى تفريغ الهاتف المحمول الخاص بك في مواجهتك؟
ج: دي حاجات من فيديوهات النت مش بجد خالص، وفيديو الحفرة دي بعته للحاجة سهير لما كنت في الأرض عشان تعرف قصة الأرض ومشكلتها بس، لكن مليش دعوة ولا كنت بدور على آثار.
س: وما هي صلتك بباقي المضبوطات تحديدا؟
ج: معرفش عنها حاجة غير الفلوس بس اللي بتاعتي.
س: وما هو تعليلك إذا لما سطروه على النحو آنف البيان؟
ج: معرفش.
س: أنت متهم وآخرين بالحفر خلسة بقصد الحصول على آثار بقصد التهريب على النحو المبين بالتحقيقات؟
ج: محصلش.
