الإفتاء: ننصح بعدم إتمام الزواج حال وجود مشكلات صحية
قال الدكتور على فخر، أمين الفتوى بدار الإفتاء المصرية، إن الفحوصات الطبية قبل الزواج هامة للغاية، ولا بد من إجرائها بشكل جيد وليس روتينيا، مضيفا: روحوا واطمنوا على نفسكم، ممكن تعمل الفحوصات تلاقي مشكلات بسيطة تتحل، وممكن تلاقي مشكلات صحية كبيرة فنحن ننصح فقط بعدم إتمام الزواج.
وتابع أمين الفتوى بدار الإفتاء المصرية، في تصريحات تلفزيونية، اليوم الأحد: الدولة عملت ليه فحوصات ما قبل الزواج، عشان في قاعدة شرعية بتقول لا ضرر ولا ضرار، بالتالي وجدوا أضرار صحية كبيرة بين الأزواج أو في خلفتهم من الأطفال، وبدأت تتفاقم المشاكل وتصل إلى الطلاق بسبب هذه الأضرار الصحية، فعشان كده المشرع المصري عمل الكشف الطبي وخلوه إلزامي عشان لو في حاجة يعرفوا يحلوها قبل الزواج.
واستكمل: لو سألنا أي زوج أو زوجة، عن الأضرار الصحية، يقولك إحنا بنحب بعض وعاوزين نتجوز، طيب بعد ما يتجوزوا والمشكلات تحصل، ايه اللى هيحصل ممكن ولا الزوج ولا الزوجة يصبروا العاطفة بتبقى غالبة، والزواج مش كله حب، لا ده فيه حقوق وواجبات، هى أو هو ميقدروش يقوموا بواجباتهم بسبب المرض، بالتالي هتحصل مشاكل فين هيكون الحب والعاطفة، طيب الأطفال هيكون عندهم مشاكل صحية كبيرة طبية بسبب الزواج ده، أنا أنصح فقط لو روحت ولقيت مشكلات صحية لا تتم الزواج، عشان متوصلش لنهاية صعبة.
