أحمد موسى: الحمد الله على نعمة الأمن.. ومافيش حد يقولي سعر الذهب بكام | فيديو
قال الإعلامي أحمد موسى، إن مصر تنعم بالأمن والأمان بفضل المولى سبحانه وتعالى وقواتها المسلحة العظيمة، قائلا:«كل واحد يرفع إيده ويحمد ربنا ويشكر فضله على نعمة الأمن، النعمة دي لا تقدر بأموال الدنيا ولا كنوزها، مفيش حد يقولي سعر الذهب بكام والجرام بكام، كلمني أنا قاعد فين وأخبارها إيه، تقولي ذهب مين، دول باعوا الذهب اللي عندهم عشان يعرفوا يوصلوا مصر وهل سألوا بكام ذهب، إحنا بنتكلم في فراغ وهواء، وناس قاعدة في تكييف، واللي جاي من السودان، لا عارف ينام إزاي، بيفطر إزاي، في أكل ولا لاء، هل سأل ثمن كيلو الأرز بكام».
وأضاف خلال برنامج «على مسئوليتي»، المذاع على قناة صدى البلد، أن كل تفكير العائدين من السودان، كان هو الوصول إلى بلدهم ووطنهم، قائلا: «ربنا يحمي جيشنا العظيم، عايزك لما تشوف أي حد من القوات المسلحة بوسه، قوله متشكرين، عشان عارف تتحرك في بلدك، وتعمل كل شيء، لما روحت ميناء أرقين، عشان نسجل مع العائدين من السودان، كنت حريص أوي، مش مهم التعب، لازم أشوف الناس دي وأروح ليهم وتشوف اللي حصل، ويسوى كام، وكمان الشعب السوداني الشقيق، ده شعب وناس مسالمة فجأة حصل اللي حصل، وحصلت الحرب، يعملوا إيه الولاد دول والأطفال والستات».
سهولة الحركة في ميناء أرقين واستقبال العائدين من السودان
ووجه موسى، التحية إلى الفريق كامل الوزير، وزير النقل، لتوفير لفريق عمل برنامج «على مسئوليتي»، سهولة الحركة في ميناء أرقين واستقبال العائدين من السودان والتسجيل معهم، كما وجه التحية لوزير الداخلية، وذلك لسهولة التنقبل ونقل ما يدور من خراب وتدمير ومعرفة قصص وحكايات الناس التي عادت من السودان، قائلا:« تخطينا مسافة الـ 1500 كيلو، علشان نشوف أهلنا وهم راجعين من السودان، ولازم نحمد ربنا ونشكر الرئيس السيسي، الرجل الذي قرر مبكرا وقال استعدوا».
وقال:« مصر في نعمة كبيرة من الأمن والأمان ده بفضل ربنا والجيش، علشان كده بقولك لما تشوف أي حد من الجيش بوسه واحضنه، الناس كانت عايزة حاجة واحدة بس هي الوصول إلى مصر، مكناش التفكير في أي شيء تاني غير العودة إلى مصر، شوفوا قعدوا كام يوم في الطريق لحد ما يرجعوا مصر».
وأكد أن الرئيس عبدالفتاح السيسي، يتابع على مدار الساعة عمليات إجلاء المصريين من السودان، مشيرا إلى أنه تم إجلاء أكثر من 6 آلاف من السودان حتى هذه اللحظة، قائلا: «دخل مصر مواطنين من 47 جنسية في عمليات الإجلاء اللى من أمريكا والصين وفرنسا والهند وتونس وبريطانيا، إحنا أكبر بلد دخل عندها جنسيات، في برقيات شكر وجهت لمصر بسبب عمليات إجلاء المواطنين من الدول الأخرى».
