الموزع مولوتوف لـ عمرو مصطفى بعد اتهامه لويجز ومطربي الراب بشراء الأغاني: اتحرى الدقة
رد الموزع الموسيقى لأغاني الراب مولوتوف على اتهام المطرب والملحن عمرو مصطفى لمطرب الراب ويجز بشراء موسيقى أغانيه.
وعلق مولوتوف عبر خاصية ستوري بحسابه الرسمي بموقع الصور والفيديوهات انستجرام، على تصريحات الملحن عمرو مصطفى، حيث قال: مبدئيا أنا هتكلم عن الأغاني اللي أنا عملتها لويجز وهي، دورك جي، بالسلامه، أسياد البلد، وبما إن أنا الموزع بتاعها أحب أقول للأستاذ عمرو مصطفى إن الأغاني معمول فيها توزيع وهندسة صوت وتلحین وشغل بالمستوى العالمي، وبتاخد وقت ومجهود وتفکیر کبیر جدًا من كل الأطراف المشتركة فيها.
وأردف مولوتوف: الموضوع مش بالسهولة والبساطة اللي حضرتك بتتكلم بيها، أما بالنسبة لموضوع الفلوس وشراء المزيكا فأنا لم أتقاضَ أي أجر على الأعمال دي لإن فيه اتفاقات بصورة تانية، في النهاية إحنا بنشكرك على استماعك بس يا ريت تتحرى الدقة قبل نشر أي معلومات، وشكرًا.
تصريحات عمرو مصطفى عن ويجز
وكان قد هاجم الملحن عمرو مصطفى مطرب الراب ويجز، وذلك خلال مداخلة هاتفي في برنامج أجمد 7، قائلًا: لموسيقى مبقتش تتعمل على الإيد زي زمان ومبقتش تروح للموزع ويعمل موسيقى بشكل تقليدي، والناس اللي طالعة جديد عندها موسيقى جاهزة ومش محتاجة موزع موسيقي ترغي معاه وتعمل معاه الشغل دة كله، وممكن أنزل كل يوم 3 أغاني لأن الموسيقى ممكن تشتريها على النت، ودة بيلغي دور الموزع.
وأردف عمرو مصطفى: على فكرة ويجز وكل الشباب اللي طالعة جديد كلهم بيشتروا موسيقى جاهزة بـ100 دولار والموزع دوره مش موجود.
