محمد رمضان: اشتريت لأبويا وأمي بيت واتجوزت في إيجار لأنهم قبلي في كل شيء
تحدث الفنان محمد رمضان عن والديه، وأبنائه، مشيرًا إلى أن علاقة جعفر بأمه في مسلسل جعفر العمدة هي نفس علاقته بوالدته في الحقيقة.
وأضاف محمد رمضان خلال استضافته في برنامج صاحبة السعادة: صفصف في مسلسل جعفر العمدة شبه أمي لكن أمي الحقيقية عندها فلتر أكتر من أم جعفر، وبتراعي مشاعر الناس وبتعرف تختار الكلمة ومش بتجرح حد، وبتفكر في الكلام أكتر.
وتابع محمد رمضان خلال لقائه مع الإعلامية إسعاد يونس: كلمة ثقة في الله نجاح اتعلمتها من أمي وأبويا، وأمي كانت مديانى قوة طول الوقت لأن عندها رؤية جبارة لبعيد، ولما عملت أدوار صغيرة أبويا قال لي ما تصرفش علشان تعرف تجيب شقة وعربية لكن أمي قالت لي لا أصرف قلت لها أنت كده بتبوظيني، فقالت لي فتافيت الطوب ما بتبنيش بيوت، وهي صاحبة الفضل الأول بعد ربنا.
وأردف محمد رمضان: أمي وزوجتي أصدقاء جدًا، واشتريت بيت أبويا وأمي وأنا كنت لسه متجوز في إيجار ولكن هما قلبي في كل شيء في الأول والآخر هما اللي عملوا الأصعب كبروني ودعموني نفسيًا وطلعوني، ولو أنا جامد جامد من جوه هما اللي أدوني الثقة والقوة.
وواصل: أبويا كان دايمًا يقول لي لو ربنا مش زعلان منك ما تخافش من أي بني آدم على وجه الأرض لكن تخاف منه حتى لو رايح من هنا للكرسي لو أنت عارف انك عامل حاجة مضيقاه، لذلك هما علموني حاجات عظيمة أوي، أقل واجب أننا نبديهم عننا لأنهم أجلوا كل حاجة وعاشوا عشنا وكنت أستغرب لما يتسألوا إيه طموحكم يقولوا أنت وأخواتك، لكن أنا وجيلي لو اتسألنا نفس السؤال هنقول أن عيالنا يكونوا جزء من طموحنا مش طموحنا كله.
محمد رمضان يتحدث عن أبنائه
كما تحدث محمد رمضان عن أولاده قائلًا: بحبهم أكتر من نفسي وشغلي ومستقلبي مش مأثر معاهم لأن الموضوع مش بالكم ممكن أقعد معاهم ساعتين في الساعتين بسمعم وبهزر وبضحك وبنزل لسنهم وبطلعهم لسني وبحسسهم أنهم شركاء في اللي بعمله وباخد رأيهم.
