زينة: كان عندي فرصة السنة دي للعبادات والروحانيات لأننا خلصنا تصوير بدري
تحدثت الفنانة زينة عن طقوسها في شهر رمضان، مشيرة إلى أنها أول سنة تشعر بروحانياته حيث إنها أنهت تصوير مسلسلها قبل الشهر الكريم.
وقالت زينة خلال لقائها في برنامج مساء دي إم سي مع إيمان الحصري: السنة دي خلصنا تصوير بدري قبل رمضان وده يحسب للمخرج، فكان عندي فرصة السنة دي للعبادات، مش الشيخة زينة، لكن كان فيه روحانيات أكتر إني عاوزة أقوم أصلي وأقرأ قرآن أو أتفرج على التلفزيون، وحسيت إني حرة، وبقالي سنين محستش الإحساس ده، فكنت مبسوطة وكان في عبادات وعزومات.
وأضافت: أنا شاطرة في المطبخ وبعرف أعمل ملوخية، وكل حاجات الإيطالي، ومليش في الحلويات، وبعمل فراخ حلو، لكني مش باكل طيور ولو عزمتيني وحطيتي في الأكل معرفش طعمها، ولكن بعملها حلو.
زينة تتحدث عن والدها
من ناحية أخرى، تحدثت زينة عن والدها قائلة: كانوا دايمًا يقولوا المناسبات بتقلب علينا المواجع، وفعلًا كل مناسبة بتيجي بتوجع أوي لأن رمضان من غير أبويا صعب، بالذات في اللمة والقعدة، وكمان بيعمل لنا بطاطس في الفرن وعصاير، فبقول إزاي اقعد على السفرة من غيره، وفيه وقت معين بدعيله مفيش حاجة في إيدي أعملها، وكذلك لما أدخل على العيد والعيدية والذكريات الحلوة وبتحاولي تعدي وتبسطي الناس اللي حواليكي زي ما هو كان بيعمل.
وتابعت زينة: أنا وارثة منه حاجات كتير زي إني أبسط اللي حواليا، لأني الأول كان عندي أنانية وعمري ما فكرت اللي حواليا عاوزين إيه، وعمري ما فكرت في أي حاجة حواليا، ولكن لما مات بقيت زيه في كلامه، ومركزة إزاي اللي حواليا يكونوا مبسوطين، وبعمل ده بحب ومش بسيب حد زعلان.
وواصلت زينة: بابا كان طيب ومحترم جدًا، وكان بيحب الطيران وبيدرسه وكان بيسافر أمريكا يتعلم، وكان دايمًا بيضحك ويتريق عليا، ولما كنا هنسافر المصيف كان مسميني بلبلة، وكان متخيل إني كسلانة شوية، لما مات صحابي كانوا بيعيطوا لأنه كان بيجيب لهم هدايا.
