أحمد فهمي: خالد يوسف شخصية جدلية.. ولو حد غيره قدم سره الباتع كان الهجوم هيقل
قال الفنان أحمد فهمي، إن الهجوم على مسلسل سره الباتع كان سيكون أقل كثيرًا لو كان نُسب لـ مخرج آخر غير خالد يوسف، الذي وصفه بأنه شخصية جدلية، مؤكدًا أنه لا يفرق معه ترتيب الأسماء على تتر العمل.
وقال أحمد فهمي خلال ندوته في القاهرة 24: كنت بتكلم مع خالد يوسف في موضوع الهجوم ده، وهو نفسه بيقول لو كان مخرج تاني كان الضغط هيقل كتير، وهو شخصية جدلية، وأنت ممكن تحبه أو متحبوش، دي وجهة نظرك أنت كمتلقي، لكن الحقيقة إن هو مخرج نجم، بدليل إن الناس بتقول فيلم ومسلسل خالد يوسف، دون ذكر اسم البطل.
وأضاف: لو كان حد غير خالد يوسف كان الضغط هيقل كتير فعلًا، ومينفعش نشغل بالنا بالهجوم على العمل على السوشيال ميديا قبل ما يتعرض، لأنك بتكون ما بين حملات مدفوعة، وبين ناس مش بتحب الشخص فعلًا، فبمجرد ما البوستر بس ينزل بتلاقي الهجوم بدأ، وبعد ما المسلسل ينجح هيشكر فيك، ويرجع يهاجمك على عمل تاني، وهكذا، فبقيت بشتري دماغي من كلام السوشيال ميديا.
كما تطرق للحديث عن فكرة ترتيب الأسماء على تتر مسلسل سره الباتع، خاصة أنه عمل يضم العديد من الفنانين، قائلا: أنا مضيت أول واحد وفي العقد كان مكتوب إن اسمي يتكتب في الأول، بس بعدين لقينا إن في أسامي كتير جدا، فـ قولت لأستاذ خالد ملهاش لازمة نكتب أسماء أصلًا، أو نكتبها في تتر النهاية.
واختتم حديثه قائلًا: حتى لو مكتبناش كده كده الناس عرفانا، ومفيش حد ميعرفش اسمي، فمش فارق ليا فعلا، وأكتر حاجة بكرهها لما ينزلي مسلسل ويكتبوا جملة.. أحمد فهمي في مسلسل كذا، بحسها فيها تنطيط شوية، عشان الناس بالفعل عارفة إني بطل المسلسل، مش لازم أعمل كده.
مسلسل سره الباتع
على جانب آخر، يشارك في بطولة مسلسل سره الباتع العديد من الفنانين، أبرزهم الفنان حسين فهمي، أحمد فهمي، أحمد صلاح السعدني، نجلاء بدر، حنان مطاوع، وآخرين، ومن إخراج خالد يوسف.
