والدة حسن شاكوش في حفل زفافه: فرحانه بيه.. وبيبوس رجلي عشان بيحبني أوي
أعربت والدة مطرب المهرجانات الشعبية حسن شاكوش، عن سعادتها الكبيرة بزواج نجلها، والذي يقام اليوم بأحد الفنادق الكبرى في القاهرة.
وقالت والدة حسن شاكوش في لقائها مع القاهرة 24: أنا حاسة بفرحة كبيرة ومبهورة بحسن، وريم بنت حبايبنا بقالها 3 سنين، وبقولها ربنا يهدي سرك.
وأضافت والدة حسن شاكوش، أنها لا تمانع عمل زوجة نجلها، موضحة: أنا مش عارفة هي ست بيت ولا لأ هي وظروفها بقى تشتغل أو لأ هي حرة.
كما علقت والدة حسن شاكوش، على صورها برفقة نجلها أثناء تقبيله قدميها، قائلة: حسن بيبوس رجلي لأنه بيحبني أوي والجمهور بيتكلم كتير خليهم يتكلموا.
واختتمت والدة حسن شاكوش حديثها: أنا مش قلقانة على حسن من إن الفن مش مضمون وبقوله فرحانه بيك وربنا يهدي سركم.
حسن شاكوش: عمر كمال اللي فضحني في الخطوبة.. وكان نفسي أبويا يكون معايا
كما قال المطرب حسن شاكوش في لقائه مع القاهرة 24، أن صديقه المطرب عمر كمال هو من كشف أمر خطوبته والذي كان حريصًا على إخفاء الأمر، موضحًا: عمر كمال هو اللي فضحني في الخطوبة، وعمر وحمو بيكا إخواتي وكل النجوم اللي جاية فرحتي بيهم كبيرة واللي هييجي هيشرفني واللي مش هيجي بردوا هيشرفنا وينورنا وأنا عالم بظروف كل واحد.
وأضاف: أنا بييجي علي عليا وقت حد بيعزمني ولكن مبقدرش أروح، وأنا عزمت وعملت اللي عليا واللي هييجي فوق دماغنا واللي مش هييجي فوق دماغنا وإن شاء الله الليلة تعدي على خير، وبشكر كل جمهوري الغالي اللي فرحان بحسن شاكوش.
وأعرب حسن شاكوش، عن حزنه بسبب عدم تواجد والده الراحل بجانبه في حفل زفافه، قائلًا: كان نفسي يكون معايا أبويا وبقوله هو كان أمنية حياته إنه يشوفني في اللحظة دي ونجاحي اللي أنا عملته، وأكتر حاجة صعبة عليا إنه مش معايا دلوقتي.
