السيسي: اوعوا يا مصريين تتسببوا مرة تانية في خراب بلدكم
قال الرئيس عبد الفتاح السيسي، إنه يريد من المصريين أن يكونوا أكثر صلابة، لأن بناء دولة أمر ليس سهلا.
جاء هذا خلال الندوة التثقيفية الـ 37 للقوات المسلحة، مضيفا: عاوزين نبقى أكثر صلابة، لأن التحديات كتير ومش هتنتهي وبناء دولة واستعادة مكانتها أمر ليس باليسير، دولة بها 100 مليون وخمسة، و6 مليون ضيوف، محتاجة جهد وتضحية، المعركة بدأت معاهم وكان كتير مننا يقول امتى تخلص، وكنا عارفين إنها هتخلص بفضل ربنا، إحنا مش بس هنعمل احفتالية في سيناء، لأ ده أحنا كمان هنعمل معرض للحرب دي، هنوريكم الحاجات اللي بقيت، اللي هم كتير قوي، من سلاح، زخاير، أجهزة اتصال، وكل ما تعنيه من أدوات حرب، الموضوع هناك مكانش بسيط.
السيسي: الكلام ده اتعمل لما البلد فكت في 2011
وتابع: الناس متعودة تشوف الحرب اللي هي دبابات وطيارات، زي الحروب التقليدية، بس الحرب دي كانت أكثر شراسة، العدو التقليدي أنت عارفه وبتشوفه، وبتقدر تتعامل معاه، لكن ده مش بنشوفه ومستخبي وسطينا، وبخسة وجبن يهاجمك ويجري، وطبعا الناس موجوعة على ولادها ومستقبل بلادها، المعرض ده هنوريكم صور بالاسم لكل اللي كانوا مجرمين هناك، بالاسم والصورة.
وأردف، اوعوا يا مصريين الموضوع ده يتكرر تاني.. اوعوا تتسببوا مرة تانية في خراب بلادكم، الكلام ده اتعمل لما البلد فكت في 2011 وهفضل أكررها ليكم وأحاسب أمام الله على هذا الكلام، الكلام ده حصل لما البلد فكت في 2011، علموا الكلام ده في المدارس والإعلام والكليات، ده فكر لتدميرالبلاد.
