باسل ألزارو: الناس كانت بتتنمر عليا لما حلقت زيرو بسبب مسلسل أحمس.. وممكن أنتج لنفسي فيلم
تحدث الفنان باسل ألزارو عن مدينة الفيوم، التي تم تصوير مشاهد مسلسل حكاية أسيل بها، كما تحدث عن جانب السينما في حياته، كاشفا أجدد أعماله الفترة القادمة.
وقال باسل ألزارو خلال حواره مع القاهرة 24: مسلسل حكاية أسيل يناسب كل الأعمار، وعملنا تسليط ضوء على الفيوم والمحافظات المختلفة اللي برا القاهرة اللي محتاجة تتشاف، لما روحنا المرة دي كانت طويلة وقعدنا نصور في الفيوم فترة طويلة، فـ شوفنا حاجات جديدة، واكتشفنا حاجات كتير بيعملوها زي الفخار والصناعات اليديوية، وأهل الفيوم طيبين جدًا والسياحة كتير هناك وبنقابل أجانب أكتر من المصريين.
وتابع باسل ألزارو حديثه، مشيرًا إلى نوعية الأدوار التي يرغب في تجسيدها، قائلًا: كنت متحمس لدوري في مسلسل أحمس بس للأسف وقف، وبحب أعمل الأدوار التاريخي والأكشن، وحلقت زيرو في مسلسل أحمس ومكنش عندي مشكلة في ده ومستعد أحلق تاني لو الدور تطلب ده، وكنت بتعامل معاملة سيئة جدًا والناس كانت بتتنمر عليا.
وأضاف باسل ألزارو، متطرقًا إلى جانب السينما في حياته، وقال: السنة دي قررت انتشر وأكون في كل حتة، وفي فيلم في العيد إن شاء الله احتمال كبير أشارك فيه، ولو دخلته ممكن يفكلي لغز عدم دخولي السينما وأدخلها تاني، أو ممكن أنتج لنفسي الفيلم اللي أنا عايزه.
باسل ألزارو يكشف أعماله القادمة
واختتم باسل ألزارو حديثه مشيرًا إلى أعماله الفترة القادمة، قائلا: هينزلي الفترة اللي جاية مسلسل بين السطور بعد رمضان، وفي مسلسل إيراني تركي بشارك فيه، وعندي البودكاست اللي بعمله إن شاء الله يفضل مكمل طول ما فينا نفس نرغي ونتكلم مع الناس.
