ليلى طاهر لـ القاهرة 24: مش عايزة أرجع للفن تاني.. سايبة الساحة للشباب ياخدوا فرصتهم
أكدت الفنانة ليلى طاهر أنها لن تتراجع عن قرار اعتزال الفن، موضحة أنها تتابع الأعمال الفنية حاليًا ولكنها تترك الفرصة للنجوم الشباب.
وقالت ليلى طاهر في تصريحاتها لـ القاهرة 24: بقالي فترة كبيرة مش بشتغل وبعد هذا الانقطاع مينفعش أرجع تاني.
وتابعت ليلى طاهر، أن المخرج أحمد توفيق كان يحرص على وجودها في أعماله الدينية والتاريخية في رمضان، بسبب إجادتها للغة العربية، موضحة: علشان أنا جيدة في اللغة العربية كان المخرج أحمد توفيق بيطلبني في أعمال دينية وتاريخية في شهر رمضان، ولو اتعرضت عليا دلوقتي حاجة ديني أو تاريخي مش هوافق لأن خلاص المشوار خلص وسايبين الساحة لـ الشباب ياخدوا فرصهم، أنا مش عايزة أرجع.
ليلى طاهر ترد على حسن يوسف: التدين لا يمنع ممارسة الحياة الطبيعية
كما علقت الفنانة ليلى طاهر على تصريحات الفنان حسن يوسف، بشأن امنتاعه عن مشاهدة الأعمال الدرامية في شهر رمضان.
وقالت ليلى طاهر في تصريحاتها: التدين لا يمنع ممارسة الحياة الطبيعية، والأعمال الفنية دي أعمال ثقافية جميلة، وممكن نستفيد منها كويس، وزي ما بقرأ كتاب أتفرج على مسلسل إيه المشكلة.
ليلى طاهر: قفلت صفحة مشواري الفني
ومن جهة أخرى، سبق أن أوضحت الفنانة ليلى طاهر، في تصريحات تليفزيونية، أنها أغلقت صفحة مشوارها الفني، قائلة: أنا عملت حاجات كتير حلوة في كل المجالات وربنا وفقني فيها وكسبت ثقة الناس، وأنا مش عايزة أعمل تاني حاجات بعد الفترة الطويلة دي تقلل من اللي عملته، لأن اللي هيجي هيبقى أقل لأن السن بيحدد الأدوار، وبقول أنا سيبت تاريخ حلو وكدة خلاص كفاية.
