جويل مردينيان: بخاف أغلط مع ربنا.. وشجعت المشاهير يتبنوا أطفال زلزال سوريا
أعربت الإعلامية وخبيرة التجميل جويل مردينيان عن سعادتها بـ تبني ابنها نايثن، مؤكدة أنه هدية من الله، بجانب الحديث عن أطفال متضرري وضحايا زلزال سوريا.
وقالت جويل مردينيان خلال لقائها مع القاهرة 24: لما روحت دار الأيتام واتبنيت نايثن كانت أجمل لحظة في حياتي وكأني اتولدت من جديد ولما بتفرج على اللحظة دي في برنامجي بحس بالشعور اللي حسيته لحظة تبني نايثن لأني كنت فاكرة إني مش هقدر اتبنى وكانت مهمة صعبة.
وواصلت جويل: أنا الأولى في التبني وغيرت وجهة نظر العالم العربي عن التبني، وبشجع غيري كمان زي المشاهير اللي أعلنوا عن رغبتهم في تبني أطفال متضرري وضحايا زلزال سوريا وفرحت جدًا لما لقيت كل المشاهير والناس متفاعلين ونفسي يكون مفيش ولا طفل في دار أيتام وأن العالم يفهموا قد إيه التبني تجربة رائعة.
جويل مردينيان: بصلي لربنا للعالم بأكمله
وأكدت جويل مردينيان أنها تصلي للعالم بأكمله، قائلة: أنا بصلي لربنا أنه يحفظ كل ولاد العالم وأولادي لأني مش أنانية حتى بـ صلاتي ومش بغلط مع ربنا وبتمنى يحفظ لي ولادي لأنهم أهم شيء عندي في الحياة.
وسبق وتحدثت جويل مردينيان عن أهمية توعية الأطفال عن الجنس، وقالت في تصريح سابق لـ القاهرة 24: لازم نعلم أطفالنا عن الجنس زي ما بنعلمهم الدين والأدب، مينفعش يعرفوا التفاصيل دي من الأنترنت لأنه فيه حاجات مقززة، وأنا والدتي معلمتنيش عن الجنس وعرفت لوحدي مؤخرًا في الحياة ومكنتش أعرف إيه الصح والغلط ومش عايزة ولادي يكونوا كدا.
