تحقيقات مارينا صلاح ضحية الإهمال الطبي.. استشاري العيون بالوطني: كانت تعاني من الالتهاب القزحي
حصل القاهرة 24 على نص التحقيقات بقضية مارينا صلاح ضحية الإهمال الطبي بمستشفى الوطني للعيون.
وجاء في استجوابات جهات التحقيق لـ الطبيبة تريز كمال أسعد جرجس، استشاري طب وجراحة العيون بمستشفى الوطني للعيون، ما يلي:
س- ما هي تفصيلات ما حدث لحالة المتوفاة إلى رحمة مولاها مارينا صلاح سركيس؟
ج- أنا قبلت العيانة أول مرة يوم السبت 2022/5/7 في عيادة الالتهاب القزحي بمستشفى الوطني للعيون وشكوى العيانة كانت تعاني من احمرار وألم وزغللة في العين بقالها شهرين وقالت إن هي كشفت قبل كدة في أماكن تانية ومش حاسة إنها بتتحسن، وأنا اخدت منها التاريخ المرضي باستفاضة وابتديت أفهم بالظبط إيه مشكلة عينيها، وبدأت أسألها عن حالتها العامة وسألتها لو كانت بتعاني من مشاكل في القلب أو الصدر أو الكلي أو الكبد أو المفاصل أو العضلات، أو عندها أي حساسية أو طفح جلدي أو قرح في الفم، ورد العيانة للأسئلة اللي أنا سألتها إنها ماكنش عندها أي شكوي من الحاجات اللي أنا قولتها دي.
وواصلت: وسألتها على التاريخ المرضي بتاع العيلة بتاعتها وعرفت إن أخوها عنده مرض الالتهاب التقرحي في القولون، هدف الأسئلة بتاعتي عشان أعرف لو هي عندها أي مشاكل عضوية في الجسم يبقى ليها علاقة بالمشكلة اللي في عنيها عشان أقرر أنواع العلاج والمفحوصات اللي محتاجة تعملها، وابتديت أكشف على عنيهان ولقيت إن عندها في عنيها اليمين التهاب قرحي قشط أمامي وخلفي في الجسم الزجاجي، والتصاقات في القزحية، وابتديت أشرحلها في المشكلة اللي عندها في عينها، وإيه اللي مسببلها المشكلة هي وجوزها، وقولتهم إن الالتهاب القزحي ممكن يكون له علاقة بالأمراض العضوية الأخرى وتحديدًا الأمراض المناعية، وده مثبت في كل المراجع والدراسات المنشورة عالميًا اللي تأكد المعلومة دي، وقولتلهم إحنا لازم نعمل آشعة على العين عشان نقيم العين أكثر وأشوف لو فيه التهاب في الأوعية الدموية بتاعت الشبكية، وقولتلهم إن ده هيساعدني على تشخيص الحالة عشان أقدر ابتدي العلاج المناسب ليها، وإديتهم ورقة الفحص اللي هي هتعمله مطبوعة بالعربي والإنجليزي وآخر مرة تم التعامل مع المريضة كان يوم السبت وهما مشيين من عندي وأنا بلغتهم إني هشوفهم بعد ووقتها نقدر نشوف طريقة العلاج على حسب نتيجة الفحص.
س- ما هي الشهادات العلمية التي حصلت عليها؟
ج / أنا معايا ماجستير طب وجراحة العيون من قصر العيني سنة 2002، وشهادة الدكتوراه في 2009 من قصر العيني وأحدت شهادة من جامعة Gkasgow بدولة اسكتلندا، ومعايا شهادة الاستشاري من النقابة سنة 2009 برده، وروحت جامعة Miami miller school of medicine ودي كانت معايشة مع أكبر دكاترة التهاب قزحي في أمريكا، وده كان حوالي 3 شهور متواصلة في 2012 وزيهم في 2013، وأنا عضو في الأكاديمية الأمريكية للرمد من سنة 2014.
س- ما هي الحالة الإكلينيكية التي كانت عليها المريضة حال قيامك بالكشف عليها؟
ج- هي كانت بتعاني التهاب قزحي
ملحوظة: قدمت لنا الماثلة تقريرا مفصلا عن حالة المريضة منذ دخولها غرفة الكشف حتى مغادرتها مكون من ثلاث صفحات في حجم الفولسكاب باللغة الإنجليزية ارفقناه بالتحقيقات عقب أن أشرنا عليه بما يفيد النظر والإرفاق بتاريخ اليوم.. تمت الملحوظة.
س- وهل المرض ده مرض مناعي أم لا ؟
ج - في الأغلب إنه مرض مناعي خصوصًا إني لما سألتها عن تاريخ العيلة المرضي تبين إن أخوها يعاني من مرض التهاب تقرحي مناعي في القولون وأنا معايا المراجع اللي يتعيد إن في علاقة بين الأمراض المناعية والاتهاب القزحي.
س - وما مدى إمكانية صبغ أصحاب الأمراض المناعية بصبغة الفلوروسين؟
ج - عندنا مراجع كثير جدًا تفيد بأن مفيش ضرر على مريض المناعة من صيغة الفلوروسين.
ملحوظة: حيث قدمت لنا الماثلة مراجع علمية تفيد بأنه توجد علاقة بين الأمراض المناعية ومرض التهاب القرحي في العين مكون من أثني وعشرين صفحة في حجم الفولسكاب باللغة الإنجليزية ارفقناه بالتحقيقات عقب أن أشرنا عليه بما يفيد النظر والإرفاق بتاريخ اليوم.
