أحمد وفيق: يوسف شاهين قالي مش عاوزك تمثل.. وبرفض الأدوار الروتينية
تحدث الفنان أحمد وفيق، عن رأيه في التمثيل ونصيحة المخرج يوسف شاهين له، كما أعرب عن سعادته الشديدة لمشاركته في مسلسل سره باتع مع المخرج خالد يوسف.
وقال وفيق، خلال لقائه مع الإعلامية إنجي علي ببرنامجها أسرار النجوم: التمثيل أن تبدو طبيعيًا وليس أن تتعامل بطبيعتك أمام الكاميرا، فأنت في الأول والآخر ممثل ومهنتك التمثيل لكنك تبذل مجهود كي تبدو طبيعيًا، ويوسف شاهين قال لي مش عاوزك تمثل، وأنا بقول لأ كتير، لأ إن حد يحطني في دور معين وأبقى موظف، لكن أنا معتمد إن فيه ناس بتفهم ومخرجين بجد عندهم القدرة على الاكتشاف.
وعن دوره في مسلسل سره باتع في رمضان 2023، قال: خالد يوسف اختارني في المودرن رغم إن الناس ممكن تتوقعني في التاريخي وانبسطت إنه شايفني غير كل الناس ما شايفيني.
وأضاف وفيق: ما بتغرش لأن التمثيل بحر والوسط غريق، لازم تكون بتعرف تعوم أو على الأقل معاك عوامة اللي هي موهبتك.
وعن رأيه في السوشيال ميديا، قال أحمد وفيق: أنا راضي ومش بتحسر على نفسي لكن بتحسر على غيري، بشوف مثلا حد ما بيعرفش يمثل بس مشهور بس خد فرصة حد موهوب وبيعرف يمثل، والمجتمعات هي اللي بتسوق ده وهي اللي بتحدد مين يبقى المشهور.
أحمد وفيق يتحدث عن المحطات الفنية المهمة في مشواره
وتحدث أحمد وفيق عن المحطات الفنية المهمة في مشواره، قائلًا: بعتبر بنتين من مصر على المستوى المهني والتأثير عند الجمهور كان نقلة لي دعمتها أهل كايرو في نفس التوقيت وبعدهم تحت السيطرة نقلة نوعية.. وأنا اعتذرت عن مسلسل علشان أركز في تحت السيطرة وكواليسه كانت فيها حالة والإنتاج كان موفر لنا الجلسات مع معالجين ومتعافين من الإدمان.
واختتم أحمد وفيق قائلا: كأنه امبارح نقلة برده وهو سبب إني أسيب دقني بيضا لأني عمي ما سيبتها كده، والمخرج كان شايفني في الدور ده وأنا فرحت بيه وكان بالنسبة لي زي تحت السيطرة لأنه في حتة محدش يتوقع إني أعملها لأن الناس كانت بتقول لسه بدري وإزاي هتقنعنا إنك أب.
