شيرين رضا: أؤمن بالصداقة بين الراجل والست.. ولا أنصح بالزواج
كشفت الفنانة شيرين رضا عن رأيها في الصداقة بين الرجل والمرأة، مؤكدة أن الصداقة أقيم من الزواج، بجانب الحديث عن طفولتها وإمكانية زواجها مرة أخرى.
وقالت شيرين رضا خلال لقائها ببرنامج abtalks: أؤمن بالصداقة بين الجنسين وكنت محظوظة إني جربت دا وعندي صديق مقرب مني وأنا 11 سنة وما زلنا أصحاب، وإحنا مشكلتنا إننا بنبص على الجنس مش إن الشخص سواء ذكر أو أنثى هو إنسان في النهاية، وصعب الناس الكبار في الوطن العربي يفهموا دا.
وأضافت شيرين رضا: أهلي كان عقلهم متفتح واتعلمت الكلام دا منهم، وأمي أجنبية ووالدي متفتح عقليا جدا، واتعلمت إن الصداقة أقيم من أي علاقة حب؛ لأن العلاقات غالبا تنتهي بالطلاق أو الانفصال، ولكن أنا غلطت لما اتجوزت وأنا صغيرة لأني كنت طفلة 21 سنة، ومكنش عندي خبرة أكون أم.
وواصلت شيرين رضا: عادي أكون مطلقة مرتين مع إني حاولت أكون زوجة كويسة وربيت بنتي وعمري ما زعقت لها، ولكن كنت أتمنى أخلف وأنا 31 سنة وعندي خبرة في الحياة.
كما تطرقت شيرين رضا للحديث عن رأيها في الزواج حاليًا، قائلة: الجواز مزيف، لأن الزوج لازم يكون صديقك المقرب وتشاركه كل شيء وتفكر معاه، ولكن الناس مش بتعمل كدا وبيكملوا في العلاقات دي من أجل الماديات ولا أنصح بالجواز دلوقتي، والجيل الجديد مش هيتجوز لأنهم شايفين اللي بيحصل، لازم الست أو الراجل يسألوا نفسهم إيه هدف العلاقة دي؟ والمفروض أنها تدوم ومعظم الناس بتتجوز عشان أشياء مادية.
آخر أعمال شيرين رضا
وعلى جانب آخر، تعيش شيرين رضا حالة من النشاط على المستوى الفني، حيث شاركت في العديد من الأعمال الفنية التي حققت نجاحا كبيرا، من بينهم مسلسل وبينا ميعاد، والذي ضم عدد كبير من الفنانين، أبرزهم صبري فواز، مدحت صالح، وفاء صادق ومحمد سليمان.
