إيساف: مطربين المهرجانات ليهم سنتين بيخرفوا وكلمات أغانيهم وحشة فوق الوصف
كشف المطرب إيساف، عن رأيه في أغاني المهرجانات، مشيرًا إلى أن آخر عامين بدأت أصوات سيئة كثيرة تظهر والكلمات أصبحت مبتذلة.
وقال إيساف لـ القاهرة 24: كانوا رايحين في حتة وحشة، وأنا عمري ما هاجمتهم، لكن بقى لهم سنتين بدأوا يخرفوا وبقى في أصوات وحشة تبدأ بهزار وتقلب بجد، وكلام الأغاني وحش جدا فوق الوصف.
وأضاف: بدأت آخد موقف وهاجمتهم لحد ما اتوقفوا، وأنا كنت مع قرار إيقافهم لأن كان لازم يحصل حالة ردع لأنهم افتكروا الحبل سايب خاصة أنهم لسة صغيرين واللي بيسمعوهم برضه صغيرين، والفن شيء مؤثر في المجتمعات علشان كدة كنت مع الوقف لأننا كنا عاوزينهم يرجعوا تاني وهما فاهمين إن في رقيب والعملية مش سايبة، وبعد الوقف حصل اختلاف وبدأوا يخافوا وبيفكروا في الكلمة.
كما كشف إيساف رأيه في أغاني الراب، مشيرًا إلى أنه لا يفهم كلامها، لكنه يحب ويجز منذ بداياته.
إيساف: أتمنى تقديم ديو غنائي مع مدحت صالح وبهاء سلطان
على جانب آخر، أكد إيساف أنه يتمنى أن يقدم دويتو غنائي مع المطرب مدحت صالح وكذلك مع المطرب بهاء سلطان.
وتحدث إيساف عن أغنيته الجديدة عشان راجل، قائلًا: قدمت الأغنية لأن فيها هدف وهو انتقاد الشباب الذي يتحدث عن زوجته أو الإنسانة التي كان مرتبط بها بعد الانفصال، لأننا للأسف بقينا نشوف مظاهر جديدة علينا، وأنا واحد من الناس استفزتني المظاهر دي، لأننا اتعودنا أن أصولنا وعادتنا مهما حصل ما نتكلمش والمفروض أصون نفسي ورجولتي.
وأشار إيساف إلى أنه يحضر لأغاني جديدة الفترة المقبلة، مؤكدًا أنه سيعود للتمثيل الفترة المقبلة.
