محمد صبحي: التكنولوجيا بتمنعك عن الصلاة.. وأتحدى أي أب وأم عارفين ولادهم بيتفرجوا على إيه
تحدث الفنان محمد صبحي، عن تأثير مواقع التواصل الاجتماعي والتكنولوجيا على الأجيال، مُشيرًا إلى أن الآباء والأمهات لا يعلمون مخاطر ما يشاهده أبناؤهم.
وقال محمد صبحي خلال تصريحات تليفزيونية: عدوك اخترع تكنولوجيا يجيد استخدامها وصدرها للشعوب المستهلكة السفهاء، وإحنا بنعيب على أحفادنا وأولادنا إنهم ماسكين التليفون 16 ساعة، لكن الأب والأم ماسكينه أكتر منهم.
وتابع محمد صبحي، مُشيرًا إلى أنه من الممكن أن يروج كارتون للأطفال لأفكار المثلية الجنسية والإلحاد، موضحًا: التليفون بيمنعك تصلي وتؤدي واجبك وتبوس إيد أمك، وأتحدى أي أب وأم عارفين ولادهم بيتفرجوا على إيه، ممكن كارتون مبهج بيعلم المثلية أو بيحتوي على أفكار ملحدة أو تدريب ممنهج لبيع الوطن، وكمان عشرين سنة هيكون فيه أجيال صعب نصلحها، والتكنولوجيا بتبعد المسافات علشان كده الصين صنعت فيس بوك خاص بيها لا يُخترق.
محمد صبحي: فقدنا البوصلة والخريطة الثقافية
كما هاجم الفنان محمد صبحي الأعمال التي تحتوي على مشاهد عنف وقتل، قائلًا: لما تجيبي واحد بيدبح، وواحد من بلد تانية يشوفه هيخاف ييجي مصر، في حقيقة الأمر ما ينفعش أجيب استثناء وأعمل عليه دراما فنية علشان أشجعك تاخد حقك بدراعك مش بقانون الدولة، لما واحد يقتل واحد كام واحد هيشوفه مش كتير، وأنتم تطلعوه ويشوفوه 300 مليون، ويخليك بطل ويحبب المشاهد في القتل والبلطجة، إحنا للأسف فقدنا البوصلة والخريطة الثقافية.
