محمد رمضان: حاسس بضغط وتحامل عليّا.. وعادل إمام في سني كان بيعمل مدرسة المشاغبين
قال الفنان محمد رمضان إنه لا يزال في بداياته، وإن الجميع يتحامل عليه ويضعوه تحت ضغط كبير، لكي يُزيد من أعماله، مؤكدا أن ما بينه وبين جمهوره هو العمل والكلمة الطيبة فقط.
وأضاف رمضان، خلال ندوته المقامة على هامش فعاليات مهرجان الأقصر للسينما الإفريقية: عادل إمام وهو في سني كان بيعمل مدرسة المشاغبين ودي نقطة لازم نلتفت ليها، أنا لسة مخلص جيش من سنة، وحاسس إن في ضغط كبير عليا، وبيتقالي قوم اشتغل أنت لسة معملتش حاجة، أنا لسة بس عايز أغسل وشي وأشرب قهوة وأبدأ أشتغل، فحاسس إن في تحامل شوية.
وتابع: أنا لسة بتعلم ومن سنتين كنت بشوف إن البطولة إن أنا لو اتحطيت في مشكلة لازم أكون واقف صلب، والنهاردة بعد سنتين عقلي نضج، وبقيت شايف إن البطولة إني أتلاشى المشاكل أصلا، وأركز في شغلي.
واختتم رمضان حديثه: اللي بيني وبين جمهوري هو الشغل بس والكلمة الطيبة، لأن أنا كان لما حد يزعلني كنت برد بطريقة تزعل الناس مني، فأنا بتعلم والله وبوعد الناس إن كل سنة يحسوا إني بتغير للأحسن إن شاء الله.
كلمة محمد رمضان في افتتاح مهرجان الأقصر للسينما الإفريقية
في سياق متصل، ألقى محمد رمضان كلمة بمناسبة تكريمه في مهرجان الأقصر للسينما الإفريقية، خلال حفل الافتتاح أمس، مشيرا إلى إنه سعيد بوجوده في هذا الحفل وتكريمه من مدينة الأقصر العظيمة.
واختتم: محتاجين إننا نحافظ على اللي عملوه جدودنا بالأدوات بتاعتنا النهاردة، هما زمان اشتغلوا فن آخر بالمقاييس زي المعمار، إحنا كمان بنقدم شيء هيفضل عايش أكتر من اللي عملوه الفراعنة وهو الفن والسينما.
