عائلته قاطعته بسبب الفن وكان يشعر بقرب وفاته.. أبرز تصريحات زوجة ونجل عمار الشريعي
حل مراد نجل الموسيقار عمار الشريعي، وزوجته ميرفت ضيفين على الإعلامية منى الشاذلي في برنامجها معكم، والمُذاع على شاشة CBC، وكشفا العديد من الأسرار عن حياة الراحل لأول مرة.
وقالت ميرفت، زوجة عمار الشريعي: عمار الشريعي كان بيتحرك بـ سلاسة مرعبة، رغم أنه كفيف، ولما كنا بنسافر ونروح مكان جديد كنت بشرحله تفاصيل البيت مرة واحدة فقط، لأنه عنده ذاكرة صورية قوية، وهو كان بيعد السلالم بالخطوات وكان بيتعامل باستقلالية ومش بيحب حد يعمله حاجة.
وواصلت ميرفت: عمار مكنش عايز يحس أنه ناقصة حاجة ودي طبيعته، وكان بيستمتع وأنا بقرأ له الأخبار الرياضية قبل ظهور الكمبيوتر، ولازم كل الجرايد تكون موجودة في البيت، وبعد ظهور الإنترنت استقل بنفسه وبقى يجيب الأخبار من النت ومبقاش محتاج حد.
وأضافت زوجة عمار الشريعي: صحابه كانوا بيقولوا لي دا عمره ما هيتجوز، ولكن كان فيه بينا قصة حب استمرت 3 سنين وأنا كنت مؤمنة بيه ومصدقاه، وفي أول مقابلة بينا كان فيه حالة كيمياء وشغف، وزمان لما كنت بروح أعزي كنت بقول الحزن بيتولد كبير وبعدين بيصغر ولكن في موت عمار الحزن عمره ما صغر، ومش مستوعبة الـ 10 سنين وحاسه أنه مرحش، وعمار كان حاسس أنه مش هيكمل وكان بيحاول ينقل كل خبراته لابنه.
واستكملت ميرفت حديثها، قائلة: أنا حاسة إني اديت الرسالة وابني اتخرج وكبر، وكان نفسي عمار يحضر لحظة تخرجه بس ملحقش، وكان نفسي أحقق اللي عمار كان بيتمناه وكنا بنحلم بيه، ولكن بعد وفاته بقيت لوحدي بعد وفاته.
نجل عمار الشريعي: بفرح لما حد يقولي إني نسخة من والدي
كما كشف مراد، نجل عمار الشريعي، تفاصيل علاقته بوالده وتأثره به، قائلًا: والدي توفي وأنا 14 سنة فقط، ولكنه كان معايا في كل مرحلة في حياتي، وبحس إنه مأثر فيا في كل شيء، وبفرح لما حد يقولي إني نسخة طبق الأصل منه، وأهل والدي قطعوا علاقتهم به، لأنه من عائلة كبيرة في الصعيد ومكنش ينفع ابنهم يطلع مزيكاتي.
