مروان حامد: 99% من أعمال والدي هي المسودة الأولى في الكتابة.. والفيل الأزرق 1 أصعب أفلامي
تحدث المخرج مروان حامد، عن بعض أسرار والده الراحل السيناريست وحيد حامد، ومدى تأثره به، كما كشف أصعب الأعمال التي قدمها طوال مشواره الفني.
وقال مروان حامد عن تخطيه لفراق والده في تصريحات تليفزيونية: بشكل يومي بشوف ناس كاتبة عن والدي حاجة، أو بقابل حد في الشارع يقولي عليه حاجة، وأصدقاؤه بيكلموني يسألوا عليا وبتفرج على أفلامه، واتعلمت من أبويا بعد ما مات أنك تسيب سيرة طيبة وأثر طيب.
السيرة الطيبة والمثل الأعلى
وأضاف مروان حامد: تأثرت جدًا بأبويا وأمي، وحبيت حياة أبويا جدًا وألهمني إلهام شديد، والمخرج شريف عرفة له تأثير كبير عليا وهو مثلي الأعلى، ونزلت معاه في البلاتوه وقررت بعدها إني أكون مخرج ودخلت معهد السينما، وعلاقتي بـ شريف عرفة هو أخويا الكبير على مستوى الشخصي والإنساني وهو صاحب فضل كبير عليا، وعلمني وبيدعمني في كل الأفلام اللي بعملها، والمخرج خيري بشارة من الناس اللي أثرت فيا.
المسودة الأولى من الكتابة
وعن أعمال وحيد حامد، قال مروان: 99% من أعمال والدي كانت المسودة الأولى من الكتابة، والسيناريو هو الفيلم مفيش حاجة بتتغير، وكان في مشروع مع والدي وتوقف.
وعن الأفلام القريبة لـ مروان حامد من أعماله وأصعبهم، علق: عندي 3 أفلام بحس أنهم فرقوا معايا، وهما فيلم لي لي وفيلم عمارة يعقوبيان وأكثر الحاجات اللي بحبها في الفيلم ده التجربة نفسها والنجوم الكبار اللي اتعاملت معاهم، وذكرت الرواية والسيناريو جدًا، وفيلم الفيل الأزرق 1 كان صعب جدًا وتعطل، بسبب أنه كان في فترة الإخوان.
