سحر رامي: سيرة الشعراوي ممكن تتقدم بفكر جديد.. والحجاب حرية شخصية
كشفت الفنانة سحر رامي عن رأيها في الجدل المُثار حول تقديم مسرحية تتناول السيرة الذاتية للشيخ محمد متولي الشعراوي، مؤكدة أنه يمكن تقديمها بـ فكر جديد.
وقالت سحر رامي لـ القاهرة 24: إيه المشكلة لما نقدم مسرحية عن الشيخ الشعراوي، التيمة الواحدة ممكن يُعاد تقديمها أكتر من مرة، وكل مرة تكون بشكل جديد، وفكر جديد وأبطال مختلفين، إحنا من قديم الأزل بنقدم أعمال بتدور حول نفس المواضيع، ولكن بشكل متطور.
وواصلت سحر رامي: أنا لو اتعرض عليا أشارك في عمل ديني هوافق طبعا، ولكن بشرط الشخصية تناسبني، وأنا عمري ما برفض أي عمل، لأن الفنان بيجسد كل الأدوار، ولكن اللي تناسبه على الرغم من اختلاف الفن باختلاف العصور، وأنا مؤمنة بالحرية وعمري ما بحكم على أي شخص، حتى اللي بيتحجبوا ويعتزلوا الفن، مع إني شايفة إن الفنان بيتولد بـ حب الفن، ولكن في النهاية دي حرية شخصية، بشرط إنهم ما يحكموش على الفنانين والناس اللي حواليهم.
وسبق أن علقت سحر رامي على رفض بعض الفنانات التلامس في الأعمال الفنية، وقالت في تصريح سابق لـ القاهرة 24: الفنانة اللي بتقول حرام حد يمسك إيدي، وحرام ألبس عريان وعندها خطوط حمراء في الفن، بقول لها متمثليش، واختاري الأدوار اللي تناسبك، إنما مينفعش تطلعي واحدة في علاقة عاطفية أو بتحب، وتقولي لأ محدش يمسك إيدي، الفن مفهوش التزام.
