سعيد جميل: تأثرت بـ جمعية أرامل مصر.. وبقول لأعضاء مجلس الشعب اقفوا جنب الرجالة
كشف الإعلامي سعيد جميل، عن أكثر الحالات التي تأثر بها والتصريحات الصادمة خلال برنامجه أنا سعيد، المذاع شاشة قناة القاهرة والناس.
وقال سعيد جميل خلال ندوة تكريمه في القاهرة 24، أن أكثر الحالات التي تأثر بها في برنامجه كغير المشاهير، هي استضافته لمجموعة من الرجال المنتمين لـ جمعية أرامل مصر، موضحًا: أكتر حاجة أثرت فيا كانت جمعية أرامل مصر، هي جمعية بتضم 2 ونص مليون راجل مصري، وفي ظل القانون الحالي الراجل ترتيبه في الحضانة رقم 12، والجمعية دي عشان أبسطها هي جمعية للراجل اللي مراته بتتوفى، والحضانة بتنتقل لـ حماته وبيسيب البيت علشان بيبقى ماسكه الحاضنة، ولما استضفت الناس دي لقيتهم شريحة كبيرة في المجتمع.
وتابع متحدثًا عن معاناة الرجال عقب وفاة زوجاتهم، قائلًا: أهل الأم بيحملوا الراجل مسؤولية وفاتها، الراجل طلع في برنامجي وبكى بحرقة وقال إحنا بنتعامل زي الحيوانات، مراتك تموت يتاخد منك عيالك ويتاخد منك بيتك ومتعرفش تشوف حاجة، كانت حلقة صعبة أوي ومن هنا خدت الموضوع ده واشتغلت عليه.
وأضاف: الحمد لله مش هقول بسببي، ولكن المواد بتاعة مناقشة القانون الجديد مكنش فيها موضوع ترتيب الرجل في الحضانة، الحمد لله الراجل بقى رقم 2 بعد الزوجة، أنا مش هقول كنت السبب ولا لأ أو شافوا البرنامج ولا لأ.
كما وجه الإعلامي سعيد جميل، نداء لـ أعضاء مجلس الشعب من خلال القاهرة 24، قائلًا: أنا بوجه نداء لأعضاء مجلس الشعب الموقرين، أرجوكم من أهم المواد اللي تم إحالتها ليكم موضوع ترتيب الأب في الحضانة، يا ريت زي ما المؤسسات الدينية نصرتهم وزي ما رئاسة الجمهورية نصرتهم وصدقت على الكلام ده كله، أتمنى تقفوا جنب الرجالة، الشريحة دي تمثل 2 مليون ونص بني آدم والرجالة ميستاهلوش إنهم يبقوا رقم 12 في الحضانة أو الولاية.
سعيد حميل
وكشف الإعلامي سعيد جميل، عن أكثر تصريح صادم من المشاهير والنجوم خلال برنامجه أنا سعيد، قائلًا: أكتر تصريح صادم من المشاهير في برنامجي كان تصريح الفنانة هبة عبد العزيز لما قالت الرجالة ماتربتش، مع إننا برنامج مسجل ولكن إحنا من القنوات اللي مساحة الحرية عندها كبيرة شوية، وهي أول ما قالت الجملة دي كأنها رمت في قلبي فحمة مولعة.
واستكمل: وهي ليها أسبابها وعلشان منظلمهاش هي لما قالت الرجالة ماتربتش كانت تقصد أن اليومين دول مفتقدين بعض المبادئ اللي كان الرجالة زمان، هو التصريح كان صادم ولكن أنا مسكتش وسألتها بتلومنا ليه ما اللي بيربي في البيت واحدة ست.
