حكايات الياسمين ديوان جديد لمحمد ناجى الإبطاوى في معرض الكتاب
صدر حديثا ديوان بعنوان حكايات الياسمين للشاعر محمد ناجى الإبطاوى، ومن المقرر أن يشارك به في معرض القاهرة الدولي للكتاب في دورته الـ 54
ومن محتوى الديوان
ولأول مرة أحس بطعم المجهول
معقول
15ساعة وانا بادعي الليل
ما يطول
علشان اسمعها بس تقول. صباح الخير
وما قالتهاش.
نفسي اتنين كيلو بلاش
علشان ارتاح
حد يعرف الدكان
اللي بيبيع بلاش
يروحوا له منين؟!
وبيفتح بدري
واللا بيتأخر زيك
لما بتتأخري في الرد؟!
حد يعرف الكيلو بكام؟!
أنا عن نفسي
ما اعرفش غير سعر الأوهام
أكيد بلاش مش بفلوس
ده بينشري بأيام وبعمر طويل
ييجي ألفين ليلة وألفين يوم
وألفين غيرة تلوع القلب الموهوم
وألفين آهة وراها آهات
وألفين حسرة وغصة وبصة عليكِ
لو حتى ف حلم
وألفين ظلم
بلاش ينشري بحاجات وحاجات
لأنه بلاش
وأول ما ينفتح الدكان
الرف بيفضى ما يستناش
بس خليكِ فاكرة
إن انا حبيتك
واديتك كام يوم م الجنة
وكان إملي اتهنا
وابطل كل عاداتي الوحشة
مثلا مثلا..
ما اسكرش
وابطل دخان
واكون متأدب اكتر
وصوتي يكون واطي
حتى إن خاني التعبير
ما انا علشانك
والله اتغيرت كتير
ما انا حبيتك بضمير
وانتِ تتأخري في الرد
15 ساعة
وان كان بلاش ما بيستناش
أنا هاشتري ألفين طن بلاش وزيادة
مش معنى إن انتِ جميلة
أكتر م العادة
وريحتك حلوة
وعليكِ طلة تهد جبال
تتأخري عني 15 ساعة
ده أمر محال
واستهبال
وانا أصلًا أهبل
إيه يعمل استهبالك في استهبالي؟!
جه على بالي اقول لك شكرا
شكرًا
خلِّ صباحك للناس الاتنين
وانا صباحي لي لوحدي
أكيد زين العقل
لكن يا خسارة
قلبي ضد مع عقلي
وقلي ف ودني
لو هي ما ردتش
هيبطل دق.
وادي آخر حكايات الياسمين.
محمد ناجى الابطاوى شاعر عاميه وكاتب درامي عضو اتحاد كتاب مصر وشارك فى بعض الأعمال السينمائية كممثل ولد بمحافظة كفر الشيخ.
