بعد حذف أغنية على وضعنا لاتهام محمد رمضان بسرقتها.. محمود بدر صاحب الأغنية: ربنا أكبر من أي حد
وجه المطرب محمود بدر، رسالة للفنان محمد رمضان، بعد اتهام الأخير بسرقة أغنية على وضعنا، التي تعاون خلالها مع الفنان أحمد عدوية ومحمد عدوية، مؤكدًا أنه لم يأخذ أجراء قانوني ضد محمد رمضان من أجل الحصول على أموال، بل ليحافظ على حقه ومجهوده.
وقال محمود بدر، في لايف مع القاهرة 24، إنه شعر بضياع مجهوده بمجرد نزول أغنية محمد رمضان، موضحًا: أنا لو في مكانة محمد رمضان مش هعمل كده ولا هاخد مجهود حد، اللي بيكتب أغاني مليون واحد، ومش الكلمتين دول اللي هيوقفوا أغنية بالنسبة ليا، ولما خد أغنيتي الدنيا كانت ضلمة في عيني، أنا قعدت من 2 يناير لغاية امبارح كنت بقول حقي راح، وكل اللي حواليا قالولي مش هتعرف تعمل حاجة، ولكن ربنا أكبر من أي حد.
وأكد محمود بدر، أن مكتب الفنان محمد رمضان، تواصلوا معه عقب حذف أغنية على وضعنا من اليوتيوب، مُضيفًا: حد من مكتب محمد رمضان كلموني بعد قفل الأغنية، وسألني عن سبب قفل التراك، وقالي حصل خير وقفل، وكلمني حد تاني من المكتب وقالي مش أصول المهنة إنك تعمل كده وفكرنا إن الشاعر قالك على الأغنية، وقالولي افتح التراك وتعالى نقعد نتكلم، وأنا كان ردي إني مش هفتح التراك لأني عايز أنزل التراك بتاعي.
وتابع محمود بدر، أنه سيطرح غدًا أغنيته التي زعم أن الفنان محمد رمضان سرقها منه، على اليوتيوب، قائلًا: أنا مش عايز فلوس ولكن عايز مجهودي يتشاف وتراكي ينجح، المقياس مش فلوس ولكن مجهود وتعب، وأورتيجا افتكر أن ورقها مش معايا لما لقى محمد رمضان عملها، وبعدين لما شاف أن ورقها كله معايا وبتاعي قالي طالما حقنا يبقى نكمل فيه، وبكرا هنزل التراك الساعة 7.
واختتم محمود بدر، حديثه موجهًا رسالة للفنان محمد رمضان، قائلًا: بقول لـ محمد رمضان ارجع بُص للمنظومة بتاعتك، ولما تاخد حاجة راجع عليها مرة واتنين لأن ممكن يكون حد غلبان وميعرفش ياخد حقه، ونصيحه بصوا لـ حاجة الناس قبل ما تاخدوها في ناس كتير بتشق طريقها وبتقول يا رب، ومتاخدوش مجهود وتعب حد.
