أسرة الشعراوي ترد على ماجدة خير الله: الفلوس اللي عملها كرم من ربنا
علقت أسرة الشعراوي، على التصريحات المثيرة للجدل التي أطلقتها الناقدة ماجدة خير الله، بحق الشيخ الراحل الشيخ محمد متولي الشعراوي.
وقالت زوجة حفيد الشعراوي، في تصريحات خاصة لـ القاهرة 24: الشيخ الشعراوي معروف فلوس جات منين وكان بيعمل إيه ويتقي الله إزاي.
وعن حديثها حول ثروة الشيخ الشعراوي التي كوّنها من الدين، كما زعمت ماجدة خير الله، قالت زوجة حفيد الشعراوي: دلوقتي أي شيخ بيطلع على قناة بيعمل برنامج بياخد أجر، وأستاذة ماجدة لما بتطلع في برنامج مش بتاخد أجر؟.
واستكملت زوجة حفيد الشعراوي: الشيخ الشعراوي عمل خير كتير جدا، محدش يعرف عنه حاجة، حد يعرف إنه كان ليه فلوس تبع الإذاعة والتلفزيون وسابها لمصر، أيضًا بنى معهد ديني في بلده وجامع، وأسس جمعية خيرية في السيدة نفسية وبنى مستشفى، وعمل مجمع خيري، حاجات كتير عملها في بلده وغير بلده، وكان بيجيب قماش ولحمة وفلوس بيوزعها كل سنة وفي رمضان.
واختتمت حديثها قائلة: الفلوس اللي عملها كرم من عند ربنا، ربنا باركله في اللي عمله وإدالوا أجر عليها أي واحد بيشتغل بياخد أجره وهو كان بياخد أجر، هو جمع الفلوس دي من الحرام ولا المخدرات ولا حاجات مشبوهة لقدر الله، كل شيخ ليه تراث زي تراث الشيخ عبد الباسط وغيره بياخد فلوس من الكتب دي، ليه مقالتش عليهم عملوا ثروة؟.
تصريحات ماجدة خير الله
من جانبه، عبرت الناقدة الفنية ماجدة خير الله عن رأيها في تقديم سيرة الشيخ الشعراوي على المسرح القومي، وذلك خلال تصريحات خاصة لـ القاهرة 24، حيث قالت: فيه ناس أكثر أهمية بكثير منه وقدموا للمجتمع أشياء مفيدة مثل يوسف إدريس ويحيى حقي، ليه نقدس الناس دي، مع إن فيه علماء ومفكرين وأدباء وأصحاب فكر ورجال وطنيين قدموا أرواحهم فداء للوطن، مصر مليانة على مدار تاريخها.
