الراجل نعمة ربنا.. فيفي عبده ترد على تصريحات ياسمين عز: إنتي نحنوحة أوي ومش سهلة
حلت الفنانة فيفي عبده ضيفة على الإعلامية ياسمين عز في برنامجها كلام الناس، وكشفت رأيها في التصريحات التي تدلي بها ياسمين عز ودافاعها عن الرجال بشكل مستمر.
وقالت فيفي عبده لـ ياسمين عز: أنتي نحنوحة أوي ومش سهلة بس لذيذة وطيبة، وممكن بتقولي الكلام ده بحسن نية.
وردت ياسمين عز على فيفي عبده قائلة: هعمل إيه.. أنا بشوف كل الرجالة غلابة والوحشين اللي بتتكلموا عليهم دول ما شفتهمش.
لترد فيفي عبده: ما شاء الله علشان ما تتحسديش ده بخت يا حبيبتي في ناس عايشة في نار جهنم، وربنا يراضي كل الستات ويرضى أزواجهم عليهم.
وسألت ياسمين عز فيفي عبده عن رأيها في التصريحات التي تعرضت بسببها لهجوم قائلة: أنا قلت في مرة أن الزوج نعمة ربنا في الأرض وأحلى حاجة في الدنيا، إيه رأيك؟
وقالت فيفي عبده: لأ طبعًا ده أنتي نحنوحة أوي يا ياسمين في حاجات حلوة كتير والستات والأولاد حلوة والصحبة حلوة، وبرضه الست ما تقدرسش تستغنى عن الراجل، ولازم الست تخلي للراجل الحياة حلوة علشان ما يستغناش عنها.
كما سألت ياسمين عز فيفي عبده عن رأيها في تصريحها بشأن السماح للحماة بأخذ مفتاح شقة ابنها، قائلة: كنت بقول إيه المشكلة لما الزوج يدي أمه المفتاح علشان تطمن على مراته لو حامل ولو مسافرين تملى لهم التلاجة أكل، لكن الزوجة بترفض وتقول له يا أنا يا أمك.
بدروها قالت فيفي عبده: ليه افرضي لا قدر الله حد حصل له حاجة، دي مفيهاش حاجة طالما عايشة بنية كويسة ومحافظة على بيتها، الحماة بتاخد انطباع حلو عن مرات ابنها، ولو كل بنت رضت حماتها بتاخد ثواب زي الأم، وأنا أي زوج أتجوزته أمه كانت تاج على راسي زي أمي بظبط.
فيفي عبده في كلام الناس
كما سألت ياسمين عز فيفي عبده عن رأيها في حق الزوجة في الانفعال على زوجها إذا دخل المنزل بالحذاء، قائلة: هل الزوجة ليها حق تزعق في زوجها لو دخل بالجزمة الشقة من غير قصد؟
وردت فيفي عبده: ليها حق تزعق، بس بطريقة النحنحة والسهوكة بتاعتك، وتقول له يا بيبي كده برضه يا حبيبي أنا لسه ماسحة ما تبقاش تعمل كده تاني.
بدورها قالت ياسمين عز: ده كده هيشلها فوق راسها ويلف بيها طول العمر.
