محمد حماقي: عمرو مصطفى مُتعب وعنده جنون الفنانين.. ومحمد منير قعدلي على أرض المسرح عشان يسمعني
كشف الفنان محمد حماقي، كواليس أغنيته الشهيرة أحلى حاجة فيكي، وتعاونه مع الفنان عمرو مصطفى، كما روى موقفًا له مع الكينج محمد منير، والذي أعرب عن حبه الشديد له.
وقال محمد حماقي، خلال حواره مع الإعلامية إسعاد يونس، في برنامجها صاحبة السعادةـ المذاع عبر شاشة قناة DMC: أغنية أحلى حاجة فيكي من تلحين عمرو مصطفى، واللي يعرف عمرو يعرف إنه متعب ومش سلس وسهل، هو مجنون جنان الفنانين ولكن بزيادة، ولكننا أصحاب من زمان.
وتابع: الأغنية ليها قصة وروحت خدت عمرو من البيت بالبيجاما قولتله هوريك حاجة في العربية، وأخدته من مدينة نصر على المهندسين عشان نشتغلها، وهي أغنية غريبة واتعملت بالمقلوب وبدأنا بالتوزيع، روحنا عند تميم وعمل كام جملة وحسيت إن معانا حاجة حلوة، وبعدين روحته وتاني يوم كملنا، واختارت جملتين من جمل أيمن بهجت قمر وبعتله كمل الأغنية.
محمد حماقي ومحمد منير
وروى محمد حماقي، موقفًا له في بداية مشواره الفني، مع الكينج محمد منير، قائلًا: منير حكاية كبيرة وأنا بعشقه، وفي مرة كنت بغني في فرح واحد صاحبي من الأقصر وده كان بعد أول ألبوم، وفي آخر الأغنية لقيت محمد منير مكنش داخل يغني ولكنه راح على الكوشة، وأنا قلبت الأغنية اللي بغنيها لـ أغنية الليلة يا سمرة وخليته يغني، وبعد ما خلص قالي أنا عايز أسمعك وغنيت أغانيه.
وأضاف محمد حماقي: لقيت محمد منير قعد على الأرض على سلم المسرح وقالي غني، وقعد حاطط إيده على راسه، وبعد ما خلصت الأغنية لقيته مشي ومقالش أي حاجة، وبعدها بفترة قابلته ومسكني من إيدي وقالي المدينة أمانة، المدينة اكتشاف في صوتك والمدينة أمانة، والكلام ده كان في آخر 2005 كان عندي ألبوم واحد.
محمد حماقي
كما تحدث محمد حماقي، عن نجاحاته في عام 2022، بجانب تعليقه على حفلته في جامعة القاهرة عام 2019، قائلًا: سنة 2022 كانت سنة كويسة جدًا على مستوى العمل قدمت أغاني كانت كلها ناجحة ومجموعة حفلاتي كانت كلها ناجحة، وحفلتي في جامعة القاهرة أنا اتخضيت ومتخيلتش إني ممكن أشوف العدد ده، لدرجة إني كنت واقف على الاستيج مكنش عارف أشوف أخر الناس.
وعلق محمد حماقي، على قلة عدد ألبوماته الغنائية على الرغم من كون مشواره الفني طويل، قائلًا: عملت في 20 سنة 8 ألبومات، الخطة بتاعة العمل بالنسبة لي لما بشوف فكرة ألبوم جديد يعني جديد ميكونش متكرر، وبختار الأغاني بعناية وبكون في الفترة دي عايش في حالة الألبوم.
وحرص الفنان محمد حماقي، أثناء حوراه على توجيه رسالة للشعب المصري، بمناسبة حلول العام الجديد 2023، قائلًا: إحنا قادرين ننهض بمصر ونخليها أعظم بلد في الدنيا لأنها تستاهل وشعبها يستاهل، وإن شاء الله نقدر ننهض في كل المجالات لأن شعبها العظيم يستاهل
