محمد حماقي: مستحيل حد يطلب يتصور معايا وأقول لأ.. طالما خرجت للناس أبقى بتاعهم
حل الفنان محمد حماقي، ضيفًا على الفنانة والإعلامية إسعاد يونس، في حلقة خاصة بمناسبة رأس السنة 2023، ببرنامجها صاحبة السعادة المذاع عبر شاشة قناة DMC.
وقالت إسعاد يونس، أنها دعت حماقي لأكثر من 8 سنوات ليكون ضيفًا في برنامجها ولكنه لم يحضر، موضحة: محمد حماقي بيتوتي جدًا وبقالي 8 سنين بقوله تعالى وهو يقولي حاضر، وقولت لأ أنا هروح البيت وجبته في إيدي ومكنش ليه حل غير إنه يجي في إيدي.
وعلق محمد حماقي، على حديث الفنانة إسعاد يونس، قائلًا: أنا معنديش أغلى منك أطلع معاه، وبعيدًا عن علاقتنا الحلوة من زمان ولكن الحوار مع حضرتك أكيد هيكون ممتع، وأنا بحب قاعدة البيت بحكم الشغل بحس إني عايز وقت أكون فيه محمد على طبيعتي بعيد عن الشغل وبدي وقت للراحة شوية لأن ضغوط الشغل كتيرة.
وأكد الفنان محمد حماقي، أنه من المستحيل أن يرفض طلب الجمهور في أخذ صورًا برفقته في الأماكن العامة، موضحًا: أنا مستحيل أبقى ماشي في مكان مهما كان مودي وحش أو في ضغوط وحد طلب يتصور معايا أو يتكلم معايا مستحيل أقوله لأ، لأنه مش صح وأنت خرجت للناس لو عايز متتعاملش معاهم أقعد في البيت، وفي وقت بتاعي وفي وقت بتاع الناس، لو خرجت للناس خلاص أنا بتاع الناس.
وتابع: أنا بحب أقعد أكل على الأرض ومن الحاجات اللي بستمتع بيها أفرش على الأرض وأقعد أكل وأنا شغال على الألبوم.
محمد حماقي
كما كشفت الفنان محمد حماقي عدد من أسرار طفولته، قائلًا: أنا عمري ما أبدأ خناقة، حتى وإحنا صغيرين مكنتش بجر شكل الناس، وطول الوقت بحاول منوصلش للخناقة ولو وصلنا ممكن أبقى أول واحد بيعمل كده، وفي طفولتي كنت شقي جدًا عكس اللي الناس شايفاه دلوقتي، كنت بعمل كل حاجة غلط جوا وبرا البيت.
وأضاف محمد حماقي، أنه ليس شخص متردد ولكنه حريص في اختياراته، موضحًا: أنا مش حاسس إني متردد ولكن أنا حريص وببقى عايز أبقى طول الوقت متأكد، والتردد مش بيحصلي في الأغاني باخد القرار ومستحيل حد يرجعني فيه وأنا مش ودني.
