ياسمين عز تهاجم جورجينا: بتخنصر من ورا كريستيانو.. وهيقلل عنها المصروف
هاجمت الإعلامية ياسمين عز، عارضة الأزياء جورجينا، صديقة لاعب الكرة الشهير كريستيانو رونالدو، وذلك بعدما أهدته سيارة رولز رويس بمناسبة عيد ميلاده منذ عدة أيام.
وقالت ياسمين عز في برنامجها كلام الناس المُذاع عبر شاشة إم بي سي مصر: ليه جورجينا مش عايزة تتعلم إنها تداري على شمعتها إيه لازمة الشو؟ بقول لها إنتي عايزة تحرجي جوزك يعني؟ وجايبة له عربية غالية وهو مش معبرك ولا عايز يتجوزك؟ وكريستيانو مش سهل ودماغه توزن بلد وفي الآخر الهدايا دي كلها من فلوسه.
وواصلت ياسمين عز: مش بعيد بعد كام يوم هيقلل مصروف البيت لأنه عرف إنها بتخنصر من وراه لدرجة إنها تحوش وتجيب له عربية زي دي، وهو كان سايب لها فلوس لمصاريف العيال واسترخصت وجابت لهم أي لبس وجابت عربية ومش مهم لبس العيد، وأنا مش عايزة جورجينا تزعل من كلامي وأنا في صف أي ست بس قبلها في صف الراجل كلنا عارفين دا.
كما وجهت ياسمين عز عدة نصائح لـ جورجينا، قائلة: يا جورجينا إنتي غلطتي غلطات كارثية وإحنا بنحاول معاه عشان يتجوزك وإنتي مفيش فايدة وقلنا مليون مرة لازم تقفي انتباه لـ جوزك ومينفعش تدي له ضهرك، وتجري على العربية الجديدة كإنك عمرك مشفتي عربيات مع إنه مركبك عربيات فضائية، تاني كارثة كان فيه بنت واقفة ورا وكان ممكن تخطفه منك وتصبه نظرة إعجاب.
وأضافت ياسمين عز: كفاية عروض أزياء وخلي بالك من بناتك ليه ملبساهم واسع كدا ومش مهتمة بمظرهم ولا شعرهم؟ مش بتغيري من أنتونيلا زوجة ميسي؟ ومش هقولك ارقصي لجوزك بس خليكي ست بيت عشان يتجوزك دا أنا الأطفال صعبانين عليا، مع إن كريستيانو خلاكي مليونيرة بعد ما كنتي بياعة شنط، بس استخدمتي الصوت والنظرة الشتوية ووقعتيه.
واختتمت ياسمين عز حديثها بنصيحة للسيدات، قائلة: أنا زعلانة على الفرعون المصري، ليه مش بنجيب له هدايا زي جورجينا؟ أرجوكي اهتمي بيه وجيبي له هدايا بدون مناسبة لأن بتوع برا مش أحسن مننا.
