شذى عن عقد قرانها: لقيت السند بعد وفاة والدي.. واتجوزت في 24 ساعة
كشفت المطربة شذى تفاصيل عقد قرانها أمس الجمعة، على رجل الأعمال وليد دعبس، مشيرة إلى أنها وجدت السند بعد وفاة والدها وتزوجت بدون تخطيط في 24 ساعة.
وقالت شذى لـ القاهرة 24: أنا اتجوزت رجل الأعمال وليد دعبس، وهو كان صاحبي من زمان وبيدعمني وبيشجعني ومش معترض على عملي كـ فنانة بالعكس دا بينصحني كتير وأنا لقيت السند والضهر بعد وفاة والدي؛ لأني كنت دايمًا بقول مفيش شخص مناسب ولكن الحمد لله لقيته ويارب ميتغيرش.
وواصلت شذى: أنا مش مصدقة إني كتبت كتابي في 24 ساعة فقط وعملت فستاني في نص يوم وملحقتش أروح للكوافير وجالي في البيت بسبب ضيق الوقت، واللي حصل إني فوجئت بيه بيقولي يلا نكتب الكتاب لأن عمي كان موجود وعائلتي، وكل شيء حصل بدون تخطيط وفجأة وكأن الموضوع من عند ربنا، وهو راجل محترم وشبهي.
عقد قران شذى
ومن ناحية أخرى، احتفلت شذى أمس الجمعة بـ عقد قرانها على رجل الأعمال وليد دعبس في حفل عائلي أقتصر على الأصدقاء وحرصت الفنانة مي كساب على حضور الحفل، كما شهد المطرب هيثم شاكر على عقد القران.
ووجهت شذى رسالة مؤثرة لـ هيثم شاكر بعد شهادته على عقد قرانها، وكتبت عبر حسابها بموقع انستجرام: طلبي منك أنك تكون شاهد على عقد جوازي ده أكبر دليل على مكانتك وقيمتك عندي وشكرا ليك على كل السنين اللي عدت واللي جاية ربنا يخلينا لبعض ويخليك ليا يا أخويا وضهري.
