نسرين طافش: اللي مش بتحب الرياضة ترقص مع نفسها في البيت
كشفت الفنانة نسرين طافش عن رأيها في عمليات التجميل، إلى جانب كشفها عن سر جمالها ورشاقتها.
وقالت نسرين طافش لـ القاهرة 24: كلنا كسيدات بنحب نكون بأحلى شكل، وأنا مع عمليات التجميل لو الست شايفة أن فيه حاجة محتاجة تتعدل وهي نفسيا مش مرتاحة لها لكن مش بشكل مبالغ فيه وتتحول لوسواس يكون الأمر تعديل للأفضل علشان الإنسان يكون مستريح مع نفسه.
وأضافت نسرين طافش: الإنسان يجب أن يتبع نظام غذائي جيد، وأنا لا أؤمن بالدايت، لكن المفترض أن نتبع لايف استايل أو نظام غذائي، مش أخنق نفسي وأحرم نفسي من كل حاجة، إلا إذا كان حد وزنه زايد بشكل كبير، لكن في الأحوال الطبيعية نمسك العصاية من النص وناخد بالنا من نفسنا وندخل خضار وفاكهة كتير مش بالضرورة كل حاجة مطبوخة.
وتابعت: الرياضة مهمة جدا اللي مش بيحب الرياضة ممكن ترقص شرقي أو ترقصي مع نفسك بالبيت قدام المراية أو رقص صلصلة أو تاحد دروس في الرقص لأن الجسم لازم يتحرك علشان ربنا خلق لنا الجسم علشان يتحرك مش علشان يفضل قاعد، وأنا بحب العب تنس ويوجا وأروح النادي وأحب امشي.
نسرين طافش تتحدث عن مشاركتها في فيلم أخي فوق الشجرة
في سياق لآخر، تحدثت نسرين طافش، عن مشاركتها في فيلم أخي فوق الشجرة مع الفنان رامز جلال، وقالت: أخي فوق الشجرة تجربة كوميدية مختلفة.. أتمنى أن ينال إعجاب الجمهور ويضحكوا من قلبهم لأني بعتبر نشر السعادة والضحك بين الناس رسالة نبيلة وسامية لأن الناس محتاجة الفرحة وإننا نرفع من معنوياتهم وذبذبات الطاقة الإيجابية عندهم، لأن الحياة فيها ما يكفي من المشاكل والكلاكيع وكلنا محتاجين نضحك.
