ياسمين جمال: معنديش مشكلة أقعد في البيت سنتين.. والسوشيال ميديا ملهاش كبير
كشفت الفنانة ياسمين جمال سبب قلة أعمالها الفنية، مؤكدة أنها تحرص على اختيار أعمالها بعناية، بجانب الحديث عن تفاصيل مشاركتها في مسلسل أم البنات بطولة سهير رمزي.
وقالت ياسمين جمال خلال لقائها مع القاهرة 24: أنا سعيدة بمشاركتي في مسلسل أم البنات والتعاون مع المخرج عبد العزيز حشاد، وأنه رشحني لمسلسل من بطولة سهير رمزي ودي أول مرة أشتغل معاها، وهي إنسانة جميلة وروحها حلوة، ودوري من الأدوار اللي بحبها وجديد وبيوصل رسالة للجمهور، وكل العوامل دي خلتني أقبل أشارك في المسلسل بدون تردد.
أما عن سبب قلة أعمالها الفنية، علقت ياسمين جمال قائلة: أنا بحب أختار أعمالي وأسيب بصمة مش أكون موجودة وخلاص، والعمل اللي بشارك فيه لازم يكون محسوب ومتشاف، وفيه حاجات مش بتليق عليا ومش بكون حاسه إنها هتزود مني أو تطلعني درجة أعلى، ومعنديش مشكلة أقعد سنتين في البيت ولكن أظهر للجمهور بشكل مناسب، ولما بحب دور لازم أعمله غير كدا مش بعرف أمثل ولازم أكون بحب الشخصية.
كما تطرقت ياسمين جمال للحديث عن السوشيال ميديا من حيث سلبياتها وإيجابياتها، قائلة: أنا زمان مكنتش متفاعلة على السوشيال ميديا ومكنش عندي حسابات عليها، ولكن أصدقائي نصحوني بالتفاعل أكتر وأكون قريبة من الجمهور على الإنترنت، وبالفعل لما تفاعلت على السوشيال ميديا لقيت عيلة تانية وحسيت إني قريبة من الناس وفرحت جدًا والسوشيال ميديا سلاح ذو حدين وملهاش كبير، وممكن تنزلك تحت أو تطلعك فوق ولكن في النهاية حب الناس أهم حاجة لأن محدش بيعرف يشتريه وحب الجمهور رزق بالنسبة ليا.
