صاحب واقعة كشري سيد حنفي يكشف تفاصيل جديدة عن وجود فأر بالأوردر: الشركة رفضت تخرّج التسجيلات
قال يوسف محمد، صاحب الواقعة الأصلي، التي حدثت في شهر يونيو الماضي وتضمنت عثوره على فأر داخل علبة كشري من محلات سيد حنفي، في تصريحات خاصة لـ القاهرة 24: في شهر 6 اللي فات، بعد ما خلصنا الشغل، كنا عاوزين نأكل حاجة سريعة، وكنا أنا و3 أصحابي في الشركة، وقررنا نطلب 3 طاجن لحمة، وواحد كشري من سيد حنفي.
الواقعة حقيقية ومن شهر 6
وتابع: كان في حد تطوع وطلب الأوردر، وفعلا طلب وأخد ساعة عقبال ما جالنا.
تفاصيل الواقعة
ويروي يوسف تفاصيل الواقعة، قائلًا: دخلنا أوضة فاضية في الشركة، وبدأنا ناكل، لحد ما حد مننا حس بحاجة كبيرة في المعلقة، مكناش عارفين إيه ده، لكن لما شيلناه من الطاجن لاقيناه فأر.
أكد يوسف أن الفأر بالكامل كان داخل الطاجن، مطبوخًا بين المكرونة والصلصة، منوهًا: في ناس بتقول إنه كان في الكيس، أو دخل من خلال الديلفيري، لكن هو كان في الطاجن مطبوخ وميت.
وواصل صاحب الواقعة: حل علينا صدمة كبيرة، وقررنا نشر صور للطاجن والفأر، محذرًا من التعامل مع المطعم.
وشدد: أحنا طلبنا من مطعم شهير، مش صغير، لكن لقينا شىء مش صغير ولا عادي، فأر في الطاجن، بالنسبة لي مصيبة.
وأشار إلى أنه نشر الواقعة عبر صفحته الخاصة عبر فيس بوك، منذ شهر يونيو الماضي، وتم التكتم على الحادث، دون رد فعل.
واستطرد: الموضوع اتفتح تاني من قريب، لما واحد صاحبنا حكى لمامته والأم نشرت بوست عن اللي حصل، وبدأت الناس تشير، لكن البلوجر اللي نشرت الصور منعرفهاش، لكن الموضوع اتفتح تاني.
وأكد أنهم لم يتمكنوا من اتخاذ الإجراءات الرسمية، نظرًا لعدم موافقة الشركة، على استخراج تسجيلات كاميرات المراقبة.
وأكد قائلًا: مدير العلاقات العامة بسيد حنفي، قال إنه عنده تسجيلات لحد بيبتزه، لكن ده مش احنا، واحد كان في الشركة ومنعرفش إنه عمل كده.
وشدد على أن الصور المنتشرة التقطها بهاتفي الخاص، لكن هناك من ادعى أنه صاحب الواقعة للشهرة، ولكن هذا عار تماما من الصحة.
