خالد الجندي: أنا منفعش في أي منصب وزاري.. والوزارة الوحيدة اللي برسم عليها القبر
وجه الشيخ خالد الجندي، عضو المجلس الأعلى للشؤون الإسلامية، المواطنين إلى ضرورة مواجهة الشائعات، التي تخرج ضد المسؤولين في الدولة، لافتا إلى أن هناك من يحاول يطمس إنجازات المسؤولين ويضلل الشعب.
وقال خالد الجندي، خلال حلقة برنامج لعلهم يفقهون، المذاع على فضائية dmc، اليوم الخميس: لازم كلنا ندعو للمسؤولين، لازم نشد على إيديهم، عشان يستمروا في إنجازاتهم لكن مينفعش كل واحد عمال ينظر ويتكلم في أسعار الدولار والين، والصوب الزراعية، البعض بيهلفط دون علم، ولما بنتكلم ونكشف الحقيقية يقولك أنتم بتطبلوا أحنا خلاص مش عاوزين حاجة وأنا شخصيا ولا أنفع في وزارة ولا غيره، الوزارة اللي برسم عليها دلوقتي هي القبر.
خالد الجندي: أنا منفعش في أي منصب وزاري.. والوزارة الوحيدة اللي برسم عليها القبر
واستكمل خالد الجندي: خليكم في أمانة الكلمة وابعدوا عن شيوخ الغل، ومن يروجون الأكاذيب، كان الله في عون المسؤولين الآن وكتر خيرهم.
وخلال الحلقة، انتقد خالد الجندي، تذكر أو ترديد البعض مقولة لقمة في بطن جائع خير من بناء جامع، عند قيام البعض بأفعال الخير، قائلا: في ناس مبتفتكرش بطن الجائع إلا وأنت رايح تصلي أو تبني مسجد أو تتبرع بمصحف ويتقلك إيه الإسراف دا، مضيفا: لكن وقت شراء الشاليهات وطابور الـBMW المستفز دا، والناس هتدفع ملايين دا حلال، ومحدش قالهم لقمة في بطن جائع، أو وهما بيشتروا الدهب بالقناطير، الناس أتسرعت على الدهب، وتذكرة مطرب من إياهم دول تأكل 3 أسر.
وشدد خالد الجندي، على أن الكلمة مسؤولية وأمانة سيحاسب عليها الإنسان، وعدم وجود الأمانة يعد علامة من علامات الساعة، وتضليل الناس وطمس إنجازات الناس المسؤولة أمر لا يصح، متابعا: المسؤولين دول بشر، لازم نشد على إيديهم لما يعملوا حاجة صح، لازم نشجعهم لما يعملوا معروف، لازم ندعيلهم عشان يستمروا في إنجازاتهم، لما نقولك أدعي لرئيس الجمهورية، أنت بتدعي لقائد المركبة وبالتالي بتدعي لركاب المركبة ولكل الركاب اللي موجودين في الأتوبيس.
واستطرد: إنما لما كل واحد ينظر، ويقول نظريته الاقتصادية ورؤيته الفلكية، ولما تلاقي الحاج سليط بتاع البطاطا بيقول رأيه في سعر الدولار والموازنة والمزارع السمكية، يبقى لازم نقول عليه العوض ومنه العوض يبقى مفيش أمانة في الكلمة.
وواصل: لما بنقول الحقيقة بيهاجمونا ويقولوا أنتوا بتطبلوا، يا جماعة التطبيل بقى كلام موضة قديمة، وأنا شخصيا منفعش في أي منصب وزاري ولا كفتجي ومليش في حاجة، معقبا: أنا الوزارة الوحيدة اللي برسم عليها هي القبر.
وأردف: ربنا يكون في عون الوزراء دول في هم ما يتلم، الوزراء في كرب ما بعده كرب، مضيفا: في عهد الرئيس السيسي، مفيش مسؤول بيعرف ينام ويتغطى، أو يعمل نفسه مطنش أو مش واخد باله.
خالد الجندي: ادعو للمسؤولين بالتوفيق.. ومتسمعوش كلام دقون الغل والسواد والفاسدة والكراهية
واختتم: الحمد لله الذي عافانا بما اختبر به غيرنا من الوزراء، وأدعو للمسؤولين بالتوفيق ولا تسمعوا لأحاديث وكلام دقون الغل والسواد والفاسدة والكراهية.
