ياسمين عز: مفيش راجل بيهاجمني.. ولا عزاء للغيرانين
ردت الإعلامية ياسمين عز على منتقدي تصريحاتها الأخيرة بشأن علاقة الرجل بالمرأة، مشيرة إلى أنها لا تتعرض للهجوم من الرجال لأنهم كائنات بريئة، كما وجهت نصيحة للنساء.
وقالت ياسمين عز خلال برنامجها على شاشة إم بي سي مصر: جماعة الست تبات برا والتحريض على خراب البيوت والصوت العالي بيتضايقوا من كلامي ومن جملتي إن مفيش كرامة بين الزوجين، ودي بتكون واحدة مشوعطة وبقول لها إنتي إيه دخلك بين المتزوجين؟ ومتجيش هنا تاني لأن كلامي عن الحنية للست المتهنية ومنطقتي محذورة عليكي لأن كلها دلع ولو قربتي هتتحرقي.
وواصلت ياسمين عز: دي كرامتنا ورجالتنا وأحنا أحرار فيها، وبقول لـ المشوعطة اللي عايزة تكون ند بند مع الراجل إنتي حرة ولكن من محتوانا متغشيش وعن الصوت الجهل وإنتي أهله متتكلميش وعن رضا الرجال متحلميش.
ياسمين عز: كلامي مبني على أساس علمي
وأضافت ياسمين عز: لما يحد يحب يعلق على كلامنا الراقي مينفعش يقول أي كلام وخلاص، لأن منظرك هيكون وحش، وكلامي ده مبني على أساس علمي زي قانون نيوتن الفعل ورد الفعل وعلم النفس، والحقد الكبير والغل من الراجل محاولة لخراب البيوت وهدم الأسرة واللسان السليط ما هو إلا دليل على شخصية مريضة وشخص اختار ينشر مرضه بين الناس وسمومه عشان يكونوا فاشلين زيه ويرتاتح ويقول مش أنا لوحدي.
كما اختتمت ياسمين عز حديثها بـ نصيحة للنساء، قائلة: ربنا يحفظ كل ست أصيلة متحملة جوزها وما أفسده الدهر يصلحه راجل، ودوري على راجل تستند على كتفه لأنه حصن وسند وحماية بعد ربنا، وأنا مفيش راجل بيهاجمني لأنه كائن بريء وجميل زي ما ربنا خلقه ومعندهوش نار الغيرة، ولو حد تطاول عليا هرد بطريقتي ولكن مش بالألفاظ دي وكله عارف تربيتي، وكلام الشوارع بنسيبه لبتوع الشوارع ولا عزاء للغيرانين.
