دينا الشربيني: ممكن أحب من أول نظرة.. والراجل لازم يكون لذيذ ودمه خفيف
تحدثت الفنانة دينا الشربيني عن علاقاتها العاطفية السابقة، مؤكدة أنها لم تشعر بالرضا في الوقت الحالي، كما كشفت عن أهم الصفات التي يجب توافرها في فتى أحلامها.
وقالت دينا الشربيني في تصريحات تلفزيونية: أنا محبتش كتير، ولما بحب بحب أوي، وممكن أحب شخص من أول نظرة، ومقدرش أحب واحد تقيل الدم لازم يكون لذيذ دي مهمة جدًا، بحب الرجالة اللي دمهم خفيف وتقال.
كما تحدثت عن انفصالها العاطفي خلال الفترة الماضية، قائلة: مفيش حد هتبقي بتحبيه هتنسيه بسهولة علشان فيه عشرة وحاجات كتير، ولكن لازم كل حد يبقى في حاجة يعرف إن الحاجة دي ممكن تخلص ولو خلصت يبقى ده الأحسن علشان ربنا شايل له الأحسن، وأنا عندي الحمد لله حاجة كويسة وهي فكرة الرضا والتأقلم، يعني أنا هقاتل علشان حاجة أنا هقدر أعملها، ولكن مش هقاتل على حاجة خلاص مش هتنفع.
دينا الشربيني
كما أكدت دينا الشربيني في تصريحاتها إنها تعيش حالة من التوازن على المستوى الشخصي بين الحب وعملها، مشيرة إلى أنها تُحب عملها بدرجة كبيرة، موضحة: أنا بحب إحساس الحب جدًا، ودايمًا بقول إن الحب مش معناه حب بين واحد وواحدة أو واحد ومراته، الحب عمومًا بين الناس والأهل والصحاب، فكرة الحب بحبها، وبحب الشغل أوي ولكن لازم يكون فيه توازن، وأنا الحمد لله عايشة حالة التوازن دي.
