أيمن السويدي أجهضني وقال مش عايز أولاد من فنانة.. أبرز تصريحات الراقصة هندية
حلت الراقصة هندية، ضيفة على أحد البرامج التلفزيونية، وتحدثت عن تفاصيل حياتها الشخصية، وفترة زواجها من رجل الأعمال أيمن السويدي، بجانب الحديث عن فترة ارتدائها الحجاب وبعدها النقاب، والعدول عنهم مرة أخرى.
ويرصد لكم القاهرة 24 أبرز تصريحات الراقصة هندية التلفزيونية:-
- أنا الحمد لله مستورة جدًا ومش محتاجة أدور على شغل من أجل إني أتعايش.
- أخويا توفي وقُلت ربنا بعتلي إشارة ومن ساعتها مرجعتش للشغل تاني.
- لما اتجوزت رجل الأعمال أيمن السويدي، كان ذكي جدًا وعمره ما قالي متنزليش الشغل، ولكن كان بيقولي أنا عايزك تقعدي معايا، ومرة جاب مياه ودلقها على شعري علشان منزلش الشغل.
- مرة أيمن السويدي، قالي انزلي بسرعة عايزك علشان بابا في المستشفى، ونزلت وأنا بالروب اللي كنت لابساه فوق بدلة الرقص، وبعدها قالي لأ أنا مزاجي إنك متشتغليش النهاردة، ودي كانت القشة اللي قسمت ضهر البعير، وقُلت مش هشتغل تاني.
- أنا حملت من زوجي السابق أيمن السويدي، ولكن هو كان بيزعق ويقول مش عايز أولاد أنا هموت وأنا صغير، ودايمًا كان عنده هاجس إنه هيموت صغير، وأجهضت وبعد كده محصلش نصيب إني أخلف.
- أيمن السويدي، قالي أنا مش عايز أولاد من فنانة، وكنت بقول وإيه يعني بكرا أجيب أولاد، ولكن من بعدها معرفتش أخلف تقريبًا الدكتور بوظلي حاجة الله أعلم.
- أنا مسامحة أيمن السويدي، لإننا جوا القبر بنبقى مش محتاجين الدعاء بس، بنبقى محتاجين لو دعوة بالرحمة، وربنا هيرزقني باللي يسامحني.
- قُلت لـ أيمن السويدي، أنا مش هكمل معاك لأنك خدت مني أي حلم الست بتحلم بيه، وأنا سيبت الفن علشان أبقى أم، وهو خد الحلم ده مني، وهو كان قريب مني في السن وطايش جدًا.
- مش بيؤرقني أن معنديش أولاد وبشكر الله، لأني بشوف المشاكل اللي بتحصل الأيام دي وبيكونوا عاق لـ أهلهم.
- أيمن السويدي، تزوج بعدي الفنانة ذكرى، ومكنش فيه أي غيرة، لأن ذكرى، كانت طيبة خالص وصاحبتي جدًا الله يرحمها، وكنت بقعد معاها كتير أوي قبل ما تتجوزه، ولما اتجوزته مزعلتش.
- رجل الأعمال أيمن السويدي، اتجوز بعدي ممثلة معروفة اسمها جيهان القمري، وأول ما بشوفها بقول لها أهلًا ضُرتي، وبقول لـ حنان ترك أهلًا ضُرتي، أصل ده موضوع وانتهى من زمان.
- أيمن السويدي، هو معايا كان ماشي زي الساعة، كنت أقول له الساعة 8 تبقى موجود في البيت كان يقولي حاضر، وكان بيسمع كلامي جدًا وواثق فيا إني بعمله كل خير.
- أنا من معاشرتي لـ أيمن السويدي، هو ممكن ينتحر أه، وهو كان الأنا عنده عالية أوي، لأن جده كان شغال في البرلمان، وجدته تركية وكانوا أغنياء غنى فاحش، وهو كان دلوعة العائلة كلها مفيش غيره، وكان متدلع بزيادة، وكان ممكن يكون شارب، الله أعلم.
- أنا لبست نقاب لمدة 3 سنين، والموضوع بدأ إني كنت قاعدة في الجامع وبصلي وواحدة جت رمت كُتيب في حجري، وأول حاجة قرأتها إن لازم الست تلبس كفن قبل الوفاة، أنا اترعبت ونزلت لقيتهم بيبيعوا الملحفة جبتها ولبستها.
- قلعت النقاب لما تعبت وجالي حساسية صدر، وروحت لـ دكتور قالي اقلعي النقاب وأنا مسؤول.
- قابلت الفنان أحمد دياب رحمة الله عليه، قالي يا أبيض يا أسود، يا تقلعي الحجاب خالص علشان تمثلي يا تقعدي في البيت، وقلعت الحجاب بعد 11 سنة.
- أنا من جوايا كنت عايزة أعتزل الرقص، لأننا كنا كل رمضان بنعمل بروفات شهر بحاله، كنت طول الوقت عندي تردد إني أكمل في المهنة وعندي هاجس ديني.
