بهاء سلطان: جبت 58% في الثانوية العامة.. وأخويا قالي صوتك شبه صوت عبده الإسكندراني
كشف الفنان بهاء سلطان، الألوان الموسيقية التي يُفضل الاستماع إليها، مُشيرًا إلى أنه لا يهتم إذا كان يفهم اللغة التي يتغنى بها المغني أم لا، والأهم أن تكون ممتعة، بجانب حديثه عن بداية مشواره الفني ونصيحة شقيقه الأكبر له.
وقال سلطان خلال حواره مع الفنانة أنغام، عبر شاشة قناة DMC: بحب اسمع الحاجات اللي أنا مش بفهمها، لكنها ممتعة، بسمع حاجات كتير مش بستوعبها لكنها حلوة، كنت بسمع سيد الكونين لـ الشيخ محمد عمران، اللي مدتها 40 دقيقة، دي أول حاجة خلتني أركز عليها مع الشيخ محمد عمران، والفترة اللي فاتت سمعته كتير، هو والموسيقى التركي مش بستوعبها علشان أتعلمها، لكنها ممتعة.
بهاء سلطان: بسمع أغاني زي أي حد
وتحدث بهاء سلطان، عن الفنان علي الحجار، موضحًا أنه من الأشخاص الذين ساعدوه في بداياته، معقبًا: الأستاذ علي قابلني مرتين زمان، ومن الناس اللي حاولوا يساعدوني، بس قبل ما كنت أشتغل كورال.. وبسمع أغاني زي أي حد ومكنتش مركز على شكل معين.
كما كشف الفنان بهاء سلطان، نصيحة أخيه الأكبر، حيث طلب منه سماع مغني يدعى عم عبده الإسكندراني، موضحًا أن صوتهما متشابه، متابعًا: ابتدت معايا كدة، وأخدت بالي إن فيه حد بيقول جملة ممكن أقول شبهه، كنت ساعتها في إعدادي، وبعد ما روحت الثانوية وجبت مجموع عجيب 58% وفي السنة التانية أخويا قالي أنا لو منك أدخل تربية موسيقية، ومن هنا بدأت حكايتي مع الغناء.
وأشار بهاء سلطان، إلى أنه تعرف على طبقات الصوت بعد التحاقه بكلية التربية الموسيقية، مضيفًا: لما دخلت الكلية الدكتور عبد الودود اختارني لـ فرقة الكلية، وطلب مني أحفظ أغنية الله ما نساني، فحفظتها بس على شعبي شوية، وهو حس إني كسلان وبغني وخلاص، وعرفت منه طبقات الصوت.
