شيرين لـ القاهرة 24: شيرين عبدالوهاب مش مدمنة مخدرات
قالت الفنانة شيرين، إنها تعتقد بنسبة كبيرة إن المطربة شيرين عبدالوهاب ليست مدمنة مخدرات، ولكنها تأخذ أدوية نفسية وهو ما جعل التحليلات تظهر أنها مدمنة، حيث إن الأدوية النفسية بها نسبة مخدر حسب ما قالت.
وأضافت شيرين لـ القاهرة 24: وهي كانت بتتعالج نفسيًا مؤخرًا فممكن تكون بتاخد بعض الأدوية اللي مصرح بيها بيكون فيها نسبة من المخدر لو عملنا تحاليل يطلع فيها نسبة من المخدر لكنها مش مدمنة مخدرات، لكن في ناس كتير بقت هي المحامي والقاضي وعشماوي ما ينفعش نحكم على حد بالإعدام وإحنا ما نعرفش ظروفه الشخصية يا ريت نبطل نتكلم على بعض ممكن لا قدر الله نقع في نفس الموقف، والمرض النفسي مش عيب ولكن شيرين محتاجة حد يقويها ويدعمها.
كما حرصت شيرين على دعم شيرين عبدالوهاب، قائلة: بقول لشيرين كلنا بني آدمين وبشر، وكلنا بنغلط، وأنتِ صوت جميل وربنا إداكي موهبة وهتقومي وترجعي لجمهورك وبناتك وتفرحي بيهم، مضيفة: أنا شايفة إنها كانت المفروض تتعالج نفسيًا منذ طلاقها من زوجها الأول، لأنها هي طلعت في كذا برنامج وعيطت وقالت أرجوك ما تسيبنيش، هي من زمان المفروض كانت تتعالج نفسيًا علشان نفسيتها تقوى، في ناس بتشوفيها زي العمارة الهايلة من جوة نفسيتها هشة.
واستكملت: شيرين موهبة عظيمة وهايلة وعندها صوت هايل وعبقرية لكن مش بتعرف تتكلم وده مش عيب، ولكن مطلوب منها تغني فقط، وحضرني موقفًا للست فيروز ربنا يديها الصحة الأستاذ عاصي الرحباني قال لها ما ترديش على التليفون تاني، لأنها صوتها هايل لما بتغني ولكن صوتها لما تتكلم أجش، علشان كده هي مالهاش حوارات وده مش عيب لما الفنان يكون عنده عيب معين لازم يخبيه، لو رجلي وحشة ما ألبسش قصير.
