السيسي يرد على منتقدي وضع التعليم في مصر: انتو مش عارفين يعني إيه دولة وبتهدوا بلادكم
ناقش الرئيس عبد الفتاح السيسي، قضية التعليم في مصر، خلال كلمته بالجلسة الختامية للمؤتمر الاقتصادي، قائلًا: في كلام بسمعه في القاعات مع المتخصصين، وكلام تاني هو الواقع الموجود في مصر.. هل انتو عاوزين تغيروه ولا لأ؟.
وأضاف الرئيس السيسي: إحنا لما جينا نتكلم عن التعليم.. اللي عملوا الدستور قالوا التعليم مجاني وللجميع.. قولنا بس، اللي انتو بتتكلموا عليهم دول ولادي ونفسي أديهم عنيا.. بس هل أنا أقدر؟.. طيب جودة التعليم هتكون إزاي والمنتج هيكون عامل إزاي؟.
وانتقد الرئيس عبد الفتاح السيسي، ما حدث بعد تعيين الدكتور رضا حجازي، وزيرًا للتربية والتعليم، من تداول مقطع فيديو قديمة له؛ يظهر نوعًا من السخرية، قائلًا: طب ندّي فُرصة.. إنت كده بتشجع زميلك.
السيسي: التعليم الأساسي فقط يحتاج 60 مليار جنيه سنويًا بدون تشغيل
وأوضح الرئيس السيسي، أن هناك 25 مليون طالب في التعليم الأساسي، منوهًا بأن الطالب الواحد يُكلف الدول المتقدمة والقادرة قرابة 10 آلاف دولار في السنة، مُعقبًا: يعني أنا محتاج 250 مليار دولار للتعليم الأساسي بس، فأنا حولتهم لـ جنيه، وقولت إدي للطالب 10 آلاف جنيه في السنة، يبقوا كدا 250 مليار جنيه، ودا كله من غير تشغيل.. مش في مدرسين، وأطقم تشغيل وكهرباء ومياه.. طيب هل ميزانية الدولة تسمح بده.
وتابع رئيس الجمهورية: طيب لو أنا عاوز لكل مدرسة مليون جنيه علشان أرفع كفائتها وأجهزها بشكل كويس.. نبقى محتاجين 60 مليار جنيه.. طيب ما هو مش موجود.. يبقى تلاقي حد حابب المدرسة والبناء ويقولك شوف المدرسة عاملة إزاي؟! معقبًا: إنت بتتكلم بلغة ثانية.. انتو مش عارفين يعني إيه دولة، وبتهدوا بلادكم.
السيسي: البناء الفكري للدستور لم يكن منتبها لقدرة الدولة على تحقيق متطلبات التعليم
ونوه الرئيس السيسي بأن البناء الفكري للدستور لم يكن منتبهًا لقدرة الدولة على تحقيق جميع هذه المطالب الخاصة بالتعليم، ومن ثم وبعد وضعها أصبحت الحكومة ملزمة بتنفيذها، وأصبح البرلمان يحاسب الوزراء عليها، مردفَا: يبقى البرلمان يحاسب الوزير، ويقف الوزير قدام البرلمان وياخد على وشه، والتعليم العالي زيه وبتاع الصحة زيه، وبتاع الكهرباء زيه، لأنه اللي بيطلب منه بيطلب حاجة مش موجودة.
وشدد الرئيس السيسي على أن المسار الفكري لبناء دولة؛ يحتاج تضافر كل الجهود بما في ذلك الفهم، وذلك لأجل تقدم البلاد.
