محمد رمضان: ممكن أتقارن بـ عادل إمام في المستقبل.. وطموحي لا يستوعبه أحد
أعرب الفنان محمد رمضان عن سعادته وشعوره بالفخر لمقارنته مع الزعيم عادل إمام، كما تحدث عن نجاحات أغانيه في الفترة الآخيرة.
وقال محمد رمضان، في تصريحات تلفزيونية: صداقتي بـ عادل إمام شرف ليا وممكن أتقارن به في المستقبل لما اشتغل عدد السنين اللي اشتغلها وأقدر أحافظ على مكانتي، إنما مقارنتي دلوقتي به هتظلمني لأن عادل إمام مدرسة كبيرة، وأنا لا أفصح عن أحلامي لأن طموحي لا يستوعبه أحد وممكن هيقولوا عليا مجنون، لكن الجمهور هيشوف كلامي سنة 2070 وهيقول إن معايا حق، وأنا كل اللي بيتقال عليا ظلم لأني مش مغرور ولا متكبر ومعرفش ليه بيعملوا فيا كدا؟ ليه بيدمروا صورتي.
محمد رمضان: أنا الفنان العربي الوحيد اللي عنده 7 مليارات مشاهدة
وتابع محمد رمضان حديثه عن نجاحاته الآخيرة، حيث قال: التسويق لنفسي مش عيب دا مفيد والشخص اللي مش بيسوق لنفسه مش صح وجمهوري لازم يكون شايف صفاتي الحلوة وأقول له إني نمبر وان مش نمبر تو، ولازم أقول له دلائل عشان اللي بيحبني هيتسأل أنت بتحب محمد رمضان على إيه؟ ومين فنان زيي الهاشتاج بتاعه 7 مليار أحيانا ودا هيقوي جمهوري وبعد خمس سنين الأرقام دي هنضحك عليها لأنها هتكون أكتر ولكن دا أعلى رقم مشاهدات لفنان عربي.
وأردف: محدش هياخد اللقب مني لأن نمبر وان بقت في العقل اللاوعي للجمهور، سيارتي من السعودية كانت هدية وهي 5 إصدارات في العالم والمحبة من عند ربنا وبحب العربيات لأن فيها صفات بتهم أي شخص ناجح زي القوة والسرعة والثبات.
