محمد رمضان: أواجه الحروب بـ ثقتي في الله.. ولن أستسلم بأي معركة لأن الحياة لا تحترم الجبان
أعرب الفنان محمد رمضان عن استيائه الشديد وحزنه بسبب الهجوم الذي يتعرض له رغم نجاحاته الأخيرة، مؤكدًا أنه يثق بالله بشكل كبير.
وتحدث محمد رمضان عن حياته وما تعلمه من أهله في صغره، وذلك من خلال تصريحات تليفزيونية في أحد البرامج، حيث قال: أنا اتولدت في عائلة متوسطة وأغنياء النفس والأخلاق والقناعة ومنحوني كنوز بتمنى أقدر أورثها لـ ولادي وهي القناعة والكرامة وأشياء كتير غيرها أهلي كانوا لا يملكون غيرها واللي مع الخبرات شوفت إن ناس بتملك المال ولكن لا يملكون ما تملكه أبويا الراجل البسيط وأي شخص أبوه وأمه ربوه يستطيع يكون أهم شخص على الكوكب، وأنا أستطيع أواجه أي حروب وأحقق أي طموح في العالم لأني ورثت ثقتي بالله من أمي وأبويا وقالت لي مفيش شيء ربنا ميقدرش يعمله.
محمد رمضان: الحرب ضد نجاحي وكل ما بتقدم أكتر بقابل الأصعب
وتابع محمد رمضان: أنا واثق في ربنا وعلى يقين إن اللي خلق القمر وخلانا نرفع راسنا نشوفه هو اللي خلقني ومفيش مستحيل ودا مش معناه ندعي ربنا ومنعملش ونجتهد ونخطط والوعي قبل السعي، ومن وأنا في مسرح المدرسة حلمت أكون نجم، ورحلة الحياة مرة واحدة ولازم نتسلح جيدا قبل أي خطوة ما دام لسه قاعد في بيت أبوك وأمك ولسه بتحلم يبقى خطط وأدرس وشوف نقاط قوتك والحرب ضد نجاحي وكل ما بتقدم أكتر بقابل الأصعب؛ لأن السمك المفترس في عمق البحر.
محمد رمضان: مستحيل أبكي ولا عاش ولا كان ولا يستطيع أحد أن يبكيني
واختتم محمد رمضان: مستحيل أبكي ولا عاش ولا كان ولا يستطيع أحد أن يبكي محمد رمضان إلا شخص بحبه واللي بيبكي مش محارب وأنا ممكن أبكي على فراق حبايب أو لو غبت عن زوجتي وولادي فترة طويلة وعمري ما أبكي في معركة وإلا هخسر والدنيا لا تحترم جبانا.
