هيثم سعيد لصبري فواز: الفرق بين قشطة يابا والمهرجانات زي الفرق بين أفلامك والتيك توك.. والأخير: ألف شكر
رد الفنان هيثم سعيد، على تساؤل الفنان صبري فواز، عن الفرق بين أغنية قشطة يابا للفنان مصطفى كامل نقيب الموسيقيين، وأغاني المهرجانات الشعبية.
وكتب هيثم سعيد، عبر حسابه الشخصي بموقع التواصل الاجتماعي فيس بوك: أقول لحضرتك يا أستاذ صبري:
(قشطة يابا): الشاعر بيقدم الكلمات للمصنفات الفنية مكتوبة قبل التنازل للمطرب.. بتفحصها لجنة قراءة للتأكد من خلوها من أي ألفاظ أو إيحاءات غير لائقة ومن أصالتها (مش مسروقة يعني)، وبعد الموافقة اللي بتستغرق 3 أيام عمل، بييجي الشاعر مرة كمان عشان يستلم الموافقة وبعدين يعمل التصريح أو التنازل للفنان عشان يدخل يسجل الأغنية، وبعدها يطرحها.. وإن لم يتم الموضوع بالآلية السابقة تتخذ النقابة الإجراء المناسب نحو الفنان النقابي سواء (عامل/منتسب) بالإيقاف أو الغرامة.
وأضاف هيثم سعيد: أما المهرجان: بيكتب الأغنية.. يسجلها.. يطرحها، يعني الفرق ما بينهم زي الفيلم اللي حضرتك بتمثله كده وأفلام التيك توك بتاعة أو الفيلم الإباحي اللي أتصور عند الهرم أو أي محتوى درامي خاص يعرض على الإنترنت بدون رقابه.. بس يا أستاذنا.
وعاد الفنان صبري فواز، ونشر رد الفنان هيثم سعيد، عبر حسابه الشخصي بموقع فيس بوك، وعلق قائلًا: طبيعي خالص أنه لما يبقى فيه حاجة مش فاهمينها، نسأل أهل التخصص.. وده اللي أنا عملته.. والوحيد اللي رد عليا هو أستاذ هيثم ( كتر خيره )، ومن إجابته فهمت أن الفرق بين الاتنين.. أن دول واخدين تراخيص ودافعين رسوم.. ودوكها مش واخدين تراخيص ولا دافعين رسوم.. شكرًا على التوضيح.. وأنا كده فهمت والموضوع انتهى.. ألف شكر.
وفي سياق متصل، سبق وتساءل الفنان صبري فواز، عن الفرق بين أغنية قشطة يابا والمهرجانات، وذلك بعد تصريحات الفنان مصطفى كامل نقيب الموسيقيين بشأن أزمة مطربي المهرجانات.
وكتب صبري فوزا عبر حسابه بموقع فيس بوك: عايزين حد متخصص من نقابة المهن الموسيقية يفهمنا ويعلمنا إيه الفرق بين المهرجانات وأغنية قشطة يابا.
