المنسي أسطورة غريبة ومش هنكون ربع عادل إمام.. أبرز تصريحات أمير كرارة في برنامج بو شعيل
حل الفنان أمير كرارة ضيفًا على البرنامج الخليجي بو شعيل، وتحدث عن تفاصيل تجسيده لشخصية الشهيد أحمد المنسي في مسلسل الاختيار، كما كشف عن أعماله الفنية القادمة.
ونستعرض لكم أبرز تصريحات الفنان أمير كرارة
معنديش في أعمالي دوبلير بس لو في نطه من عربية أو شباك عالي بيكون في حد أنا معرفش أعمله، في ناس دي شغلتهم
احنا لغاية ما نموت ونسيب الشغلانه مش هنكون ربع ولا تمن عادل إمام
أحلى حاجة في بيتر ميمي هو عارف عايز إيه
مفكرتش بعد الاختيار أن أتعرض لأي تهديد من الجماعات الإرهابية
زرت عائلة المنسى وأصحابه المقربين مش لأجل أخذ شخصيته بل من أجل الخطوط العريضة في حياته
الشهيد أحمد المنسي كان غريب جدًا.. وأسرته بتحكيلي عنه قولتلهم هو في حد بيعمل كده
أتشرفت لأني عملت مسلسل الاختيار.. والمنسي كان أسطورة غريبة
بتبسط جدًا لما أم تشوفني في الشارع وبتقولي أنت قدوة ابني
خالد وتاسيون اللي كانوا مع المنسي كانوا معايا في حلقة استشهاده.. وكانوا بيقولوا ليا عمل إيه قبل وفاته
كنت حامل هم ابن المنسي بسبب إنه هو هيتفرج على الحلقة ويشوف والده اتوفى إزاي وكان مستني الرصاصة متجيش في دماغ والده
جارتنا كانت بتقرأ الفنجان وقالت لوالدتي في واحد من أولادك مصر كلها هتشاور عليه
برنامج سهرانين الناس كلها بتحبه علشان بنقعد ندردش ونغني ومبنخشش في تفاصيل حد
لو شاركت في عمل رومانسي أحب إني أِشتغل مع منى زكي ومنة شلبي وهند صبري
كنت مرتبط بوالدتي جدًا ومن كتر الشبه في النادي الناس كانت بتقول ابن ليلى أهو
كل الجواكيت الجلد اللي صورت بيها المسلسلات عندي مش بفرط فيها بحب أحتفظ بيهم
محبتش مسلسل الطبال وبعتبره اختيار غلط وبعديها ربنا عوضني عوض كبير بكلبش 1
الناس زهقت مني لأني مقدمتش جديد بعد مسلسل الطبال زيه زي حواري بوخاريست،، وأداني درس كبير
سليم ابني ميعرفش إن أنا في الكويت بصور البرنامج وخوفت أقوله علشان ميزعلش
باخد سليم معايا اللوكيشن وبخليه يشتغل مع الناس وبيقبض من الإنتاج علشان يعرف إن أبوه مش بيلعب
فيلم حرب كرموز نقلة مهمة جدًا وخوفت منه وقولت لبيتر ميمي نهايتي هي بدايتي.
قلقت قبل المشاركة في حرب كرموز علشان الجمهور ميقولش إني بكرر نفسي.
هعمل كازبلانكا 2 والمسلسل الجاي هيكون رومانسي.
بحب الحشرات والحيوانات وبخاف من الأسانسير.
مفكرتش أدخل في مجال الإنتاج أو الإخراج.
