أميرة عبد العظيم: الست متعتها إنها تخدم زوجها
تحدثت الإعلامية أميرة عبد العظيم، عن علاقة المرأة بزوجها، مشيرة إلى أنها تسير على الثوابت القديمة وما تعملته من والدتها، حيث تستنكر المطالبات بالحصول على أجر مقابل خدمة الزوج.
وقالت أميرة عبد العظيم: الست لما تتجوز تسيب حريتها على باب البيت، بسمع بعض الآراء بتستفزني كـ ست، زي إن الست من حقها تخرج وتبات برا البيت من غير إذن جوزها، مفيش حاجة اسمها كده، الراجل ميعاملش ده، هو في راجل هيخرج ويبات برا من غير ما يقول لـ مراته؟ ده عبث.
أميرة عبد العظيم: أنا طلعت لقيت أمي بتعامل أبويا بطريقة محترمة
وأضافت: أنا طلعت لقيت أمي بتعامل أبويا بطريقة محترمة جدًا، وأنه يلاقي أحلى حاجة على السفرة، وتقول لنا مش عاوزة أسمع صوت، فبقيت أعمل ده وممكن يقولوا عليا دقة قدمة، لكني بعمل الأصول، وزوجي له حقوقه وواجباته ومش معنى إني ضعيفة أو أني بتعامل بالثوابت أبقى خاضعة ومستكينة، لكن لو الزوج اللي معاكي سوي وما عندوش عقد، وبيدكي عينه يبقى تاج راسي، وأنا بشوف إن جوزي لازم يكون باشا.
وتابعت: لما تيجي تقوليلي كلمة حلوة هرد عليكي كلمة أحسن، مش ممكن عمر الكلمة الحلوة ما تترد بإساءة لو إديتي جوزك كلمة حلوة هتاخدي عنيه.
أميرة عبد العظيم: الست متعتها إنها تخدم زوجها
كما أكدت أميرة عبد العظيم، أنها لا تحب أن يقدم أحد غيرها القهوة لزوجها، قائلة: ممكن أبقى تعبانة وأعملها بنفسي، ودي حاجة بتسعدني وبتضيف ليا سعادة وبحب أعمل كل حاجة بنفسي.
وعن مطالبات البعض بأخذ أجر مقابل خدمة الزوج، قالت: مش قادرة أصدق الكلام ده، إزاي تخدم زوجها وتقول له هات مقابل متعة، الست متعتها إنها تخدم زوجها وتحس إنه مسئول منها وإنه معتمد عليها وإنها بالنسبة له مهمة، لو الست أخدت أجر هتبقى زي اللي بيساعدوا في البيت، فين دوري، زي اللي بيقولوا اللي بترضع البيبي عاوزة فلوس، إزاي دي سعادة الأم وحنانها وإحساسها بأنوثتها وكل المشاعر الجميلة لما بترضع البيبي بتاعها دي ثوابت ما حدش يجي جمبها ليه بنسخن الستات.
