بشير الديك: فريد شوقي اعترض على وجود أحمد زكي في طائر على الطريق.. وعادل إمام الأعلى أجرًا
كشف الكاتب بشير الديك كواليس تعاونه مع الفنان أحمد زكي، مؤكدًا أنه لم يكن أعلى فنان أجرًا، بجانب الحديث عن فيلم الحريف والزعيم عادل إمام.
وقال بشير الديك خلال ندوة فيلم سواق الأتوبيس في مسرح الهناجر بدار الأوبرا المصرية: أحمد زكي هو اللي كان هيعمل فيلم الحريف، ولكن حصل خلاف أثناء تصوير العمل، والمخرج محمد خان قالي تعالى نجيب عادل إمام لأننا منتجين الفيلم ومن حقنا نختار، قولت لـ محمد خان إن أحمد زكي هيزعل وممكن عادل إمام يرفض الفيلم لأنه بقى نجم وعمل أعمال كتير.
وواصل بشير الديك: اتفاجئنا إن عادل إمام وافق على طول على فيلم الحريف مع إنه كان أعلى فنان أجرًا هو والفنانة سعاد حسني وكان بياخد 35 ألف جنيه ساعتها، وأحمد زكي مكنش أعلى أجر زي ما البعض بيقولوا بالعكس لو حد ضغط عليه ممكن ينزل من أجره.
فريد شوقي اعترض على وجود أحمد زكي في طائر على الطريق
كما أشار بشير الديك إلى أن فريد شوقي اعترض على وجود أحمد زكي فيلم طائر على الطريق، قائلا: فريد شوقي لما عرف إن أحمد زكي في الفيلم، قال لنا: أنتم اتجننتوا إزاي تطلعوا عيل عليا؟
وتطرق بشير الديك للحديث عن سلبيات السوشيال ميديا، قائلا: السوشيال ميديا بتلعب دور خطير في المجتمع كله، وبقى ليها المفردات لوحدها، وكله بيدور إزاي يعمل أقبح الأشياء.
