فتاة تستغيث من بطش والدها: مسك علينا سكين وطردنا من بيتنا.. وبنشوفه بيجيب ستات البيت
استغاثت فتاة تدعى حلا رزق وتبلغ من العمر 20 عاما من تعدي والدها المستمر عليها وعلى شقيقها صاحب الـ 25 عاما، بالإضافة إلى رفضه طلاق والدتها، وفق قولها.
فتاة تستغيث من بطش والدها
وقالت حلا التي تقطن في منطقة العيسوي بمحافظة الإسكندرية لـ القاهرة 24، إن والدها طردهم جميعا من المنزل دون أن يحصلوا حتى على ملابسهم، مؤكدة أنهم يعيشون الآن في منزل خالتها.
وتابعت الفتاة: للأسف محدش قادر يتكلم معاه من الخوف، حتى في حدوث الطلاق، وإحنا كنا قاعدين في بيتنا بقضايا تمكين ورافعين قضية نفقة عليه، لأنه بيطردنا دايما وبيغير طبلة الباب.
وتابعت الفتاة: آخرة مرة ضربنا ومسك علينا السكين، وكل شوية يتهجم علينا ويكسر الباب ويضربنا، ولما مسك السكين علينا قفلنا على نفسنا باب الأوضة بالمفتاح، كسره، وحاولنا نسحب السكين منه أنا وأمي وأخويا، لحد ما خدناها.
أب يمسك السكين على أولاده
وأكملت حلا خلال حديثها مع القاهرة 24: أخويا مسك السكين منه وكان عايز يموت نفسه، وأنا وأمي حاولنا نشد منه السكينة وننقذه، راح أبويا زق السكينة على رقبة أخويا عشان تدخل فيه وتموته.
وأكدت الفتاة: أبويا مش راضي يطلق أمي، ومش راضي يصرف علينا ولا يجيب لنا مكان نقعد فيه، رغم إنه مقتدر ماديا جدا، ولسه معلمناش محضر لأنه بيخلص أي حاجة بالفلوس ومعارفه.
ولفتت الفتاة إلى أن الخلافات نشبت بينهم وبين والدها منذ زمن بعيد، مضيفة: هو قاعد معانا ومش راضي يمشي، وأنا وأخويا بنشوفه بيجيب ستات البيت والبواب والجيران يشهدوا، وهو اتسجن قبل كدة 6 سنين في قضية مخدرات، وبيتلذذ بتعذيبنا.
واختتمت حديثها قائلة: كل اللي بطلبه إنه يطلق والدتي ويجيب لنا مكان نعيش فيه ويصرف علينا، مش طالبين أكتر من كدة.
