أحمد السعدني: والدي لا يُفكر بالعودة نهائيًا.. وسعيد بتكريمه من القاهرة للدراما
تحدث الفنان أحمد السعدني، نجل الفنان القدير صلاح السعدني، عن تكريم والده بمهرجان القاهرة للدراما، وسبب عدم حضوره المهرجان واستلام التكريم نيابة عن والده.
وقال أحمد السعدني، في مداخلة هاتفية ببرنامج مساء DMC، الذي يقدمه الإعلامي رامي رضوان: مستلمتش تكريم والدي في مهرجان القاهرة للدراما، لأن حصلي ظرف صحي، وأكيد لو كنت قادر كنت روحت، ومقدرتش أنزل شكر للمهرجان تاني يوم لأن حصلت وفاة أستاذ هشام سليم رحمه الله وأسكنه فسيح جناته، إحنا الأحداث متلاحقة، ونزلت نعي للأستاذ هشام، وانتظرت بضعة أيام وبعدين نزلت الشكر للمهرجان وكتبت سبب عدم حضوري.
وأعرب أحمد السعدني، عن انزعاجه من التعليقات السلبية التي تلقاها نتيجة عدم حضوره المهرجان واستلامه تكريم والده، قائلًا: الحقيقة مش قادر أفهم اللغط اللي حصل واللي مالوش أي سبب ولا داعي، يعني شرف ليا إني كنت أتسلم تكريم والدي من مهرجان القاهرة للدراما، وكان صعب عليا جدًا إني محضرش أكتر من أي حد تاني.
وحرص أحمد السعدني، على توصيل رسالة والده القدير صلاح السعدني، عن تكريمه بمهرجان القاهرة للدراما، قائلًا: والدي سعيد جدًا لأن التلفزيون بيته، وأول مسلسل أتعمل في شهر رمضان الكريم كان مسلسل الضحية بطولة الفنان صلاح السعدني، هو كان حاسس إنه بيتكرم ف بيته، وهو في غاية السعادة والامتنان والشكر، وطبعًا لما يبقى التكريم من زميل عمر زي الفنان يحيى الفخراني، ومن النقابة اللي هي البيت الكبير اللي بيضمنا كلنا، فهو في غاية السعادة، وحابب إني أوصل الكلام ده عن لسانه.
وتابع أحمد السعدني حديثه عن والده، مؤكدًا أن الفنان صلاح السعدني اتخذ قرارًا بالابتعاد نهائيًا قائلًا: هو متابع والله لكل حاجة، والحمد لله وحب الناس هي ثروت الفنان الحقيقية، وهو من أكتر من 5 أو 6 سنين خد قرار بالابتعاد نهائي، وأعتقد إن ده حقه.
وأضاف أحمد السعدني ممازحًا: وأنا بفكر في الموضوع ده من دلوقتي، ونفسي الناس ترحمنا شوية، يعني اللي بيكتب كلمتين على السوشيال ميديا ده الرحمة حلوة يا إخوانا.
