أرملة سعيد صالح لـ فكري صادق: متكلمتش من 35 سنة عشان معندكش الجرأة تتكلم وهو عايش
أعربت أرملة الفنان سعيد صالح عن استيائها وغضبها الشديد، بعد تصريحات الفنان فكري صادق بشأن فيلم سلام يا صاحبي.
وتحدثت أرملة الفنان سعيد صالح عن هجوم الفنان فكري صادق على الفنان سعيد صالح، وذلك من خلال فيديو لـ القاهرة 24، حيث قالت: رسالة للفنان فكري صادق، أولًا أما يذكر اسم سعيد صالح فأنت بتتكلم عن مدرسة الفن والكوميديا في مصر والوطن العربي، عن نجم حضر سينما الأبيض والأسود والألوان، عن نجم ليه أرشيف كبير أوي في الفن ورصيد كبير، فلما يذكر اسمه تقول النجم سعيد صالح.
وتابعت: بعدين معلش سؤال حضرتك ليه متكلمتش من 35 سنة عن ترشيحك لدور في فيلم سلام يا صاحبي، من 35 سنة مفكرتش تتكلم وهو عايش، عارف ليه عشان معندكش الجرأة تتكلم وهو عايش، زي الجرأة اللي عندك دلوقتي، أنا مش محتاجة أقول للجمهور مين سعيد صالح، الجمهور عارف مين سعيد صالح، والظاهر حضرتك متعرفش مين سعيد صالح، وبناءً عليه، تكلمت كده، وحسيت إن الأضواء اتشالت عليك شوية، فحبيت تفكر الناس بيك مرة تانية.
أرملة سعيد صالح: ساب اللي يعرف يجيب حقه.. وهو لو موجود كان رد عليك
واختتمت: بس جمهور النجم سعيد صالح مسكتش، ومش هقولك النجم سعيد صالح وراه رجال، لا وراه مراته، اللي مش هتسمح لحد يجيب سيرته وهو مش موجود، لو هو موجود كان هيرد، ومكنتش أقدر أفتح بوقي، كلمته سيف على رقبتي، لكن سعيد صالح ساب وراه اللي يعرف يجيب حقه، وأنا حق النجم سعيد صالح هعرف أجيبه.
