سلوى خطاب: التمثيل لا يشغلنا عن عبادة ربنا
أكدت الفنانة سلوى خطاب أن الموهبة سواء التمثيل او أي شيء آخر هبة ونعمة من الله عز وجل، وأن الله لن يعطي موهبة لشخص ممكن أن تكون حراما.
وقالت سلوى خطاب في تصريحات لـ القاهرة 24: ربنا مش بيدي لحد موهبة ممكن تكون حرام المهم هنستغلها في إيه لو حد صوته حلو ممكن يعمل حاجات حلوة تفيد الناس وتهذبهم وتخليهم في حالة كويسة والوسيلة والموهبة نعمة.
وأضافت: يا ريت الناس تيسر الإيمان زي ما ربنا مسهله مش يصعبوه علينا، كاشفة رأيها في اعتزال بعض الفنانين لكي يتفرغوا للعبادة: الفن مش بيشغلنا عن العبادة، والإيمان في القلب والفنانين في اللوكيشن بيسبوا التصوير وبيصلوا وقت الصلاة وربنا مش هيدي حد موهبة ممكن تكون حرام المهم إزاي نستغلها.
وتابعت: يجب أن نحترم اختيارات الناس وربنا هو اللي هيحاسب الناس على اختياراتهم وقوة إيمانهم أو قلتها.
واستكملت: الصلوات الخمس مش هياخدوا ساعة، فنانين كتير بيصلوا في اللوكيشن ومفيش مانع.
رأيها في المهرجانات الفنية
من ناحية أخرى، كشفت سلوى خطاب رأيها في المهرجانات الفنية، إلى جانب رأيها في الشروط التي وضعها الفنان حسين فهمي لملابس الفنان في مهرجان القاهرة السينمائي المقرر عقده بعد أسابيع.
وأشادت سلوى خطاب بمهرجان القاهرة للدراما في دروته الأولى الذي أقيم قبل أيام، مضيفة: الجوائز في محلها ولفتة إنسانية وشيك من القائمين على المهرجان لتكريم الفنانين المنسيين.
كما كشفت رأيها في الشروط الموضوعة من حسين فهمي لملابس الفنانات في مهرجان القاهرة قالت: ممكن يلتزموا من غير شروط، الشياكة ليس لها علاقة بالعري، بعض الفنانات يحاولن مواكبة المهرجانات العالمية ولكن يا ريت قبل أن نواكبها في اللبس نواكبها في الأفلام، مضيفة: مهرجان الجونة له وضع خاص لأنه مهرجان في مصيف.
